काठमाडौँ। इन्डोनेसियामा शनिबार बिहान ७.४ रेक्टर स्केलको शक्तिशाली भूकम्प गएको छ। राष्ट्रिय भूकम्प विज्ञान केन्द्र (एनसीएस)का अनुसार स्थानीय समयअनुसार बिहान ३ बजेर २८ मिनेटमा गएको भूकम्पको केन्द्र ४९ किलोमिटर गहिराइमा रहेको थियो।
एनसीएसका अनुसार भूकम्पको केन्द्रबिन्दु ८.५५७ डिग्री दक्षिण अक्षांश र १२१.१८१ डिग्री पूर्वी देशान्तरमा रहेको थियो। शक्तिशाली भूकम्पपछि युरोपियन-मेडिटेरेनियन सिस्मोलोजिकल सेन्टर (ईएमएससी)ले सुनामीको चेतावनीसमेत जारी गरेको छ।
मुख्य भूकम्पपछि फ्लोरेस सागर क्षेत्रमा दुई शक्तिशाली परकम्प गएका छन्। बिहान ३ बजेर ४३ मिनेटमा ६.३ रेक्टर स्केलको भूकम्प ६३ किलोमिटर गहिराइमा गएको थियो।
त्यसको करिब १५ मिनेटपछि बिहान ३ बजेर ५८ मिनेटमा ६.० रेक्टर स्केलको अर्को भूकम्प गएको एनसीएसले जनाएको छ। यसको केन्द्र ४२ किलोमिटर गहिराइमा रहेको थियो।
फ्लोरेस सागर इन्डोनेसियाका फ्लोरेस र सुलावेसी द्वीपबीच पर्छ। लगातार शक्तिशाली भूकम्प गएपछि सम्भावित जोखिमलाई ध्यानमा राख्दै सम्बन्धित निकायले अवस्थाको निगरानी बढाएका छन्।
इन्डोनेसिया विश्वका सक्रिय भूकम्पीय तथा ज्वालामुखीय क्षेत्रमध्ये एक हो, जहाँ प्रशान्त महासागर वरपर फैलिएको सक्रिय भूकम्पीय क्षेत्रका कारण बारम्बार भूकम्प जाने गर्छ।
