काठमाडौँ । विश्व फुटबलले नयाँ च्याम्पियन पाएको छ। १२० मिनेटसम्म चलेको रोमाञ्चक, तनावपूर्ण र उच्चस्तरीय प्रतिस्पर्धापछि स्पेनले साविक विजेता अर्जेन्टिनालाई १-० ले पराजित गर्दै फिफा विश्वकप २०२६ को उपाधि जितेको छ।
अमेरिकाको न्यूयोर्क-न्यूजर्सी स्टेडियममा सम्पन्न फाइनलमा निर्धारित ९० मिनेट गोलरहित बराबरीमा सकिए पनि अतिरिक्त समयमा फेरान टोरेसले गरेको एउटै गोल स्पेनलाई विश्व फुटबलको शिखरमा पुर्याउन पर्याप्त बन्यो।
सुरुदेखि नै स्पेनले बलमाथि नियन्त्रण कायम राख्दै आफ्नो परिचित पोजेसन फुटबल प्रदर्शन गर्यो। अर्जेन्टिनाले भने काउन्टर आक्रमणमा भर पर्दै अवसर सिर्जना गर्ने प्रयास गर्यो। पहिलो हाफमा दुवै टोलीले गोलका केही अवसर बनाए पनि दुवै गोलरक्षक र रक्षापंक्तिको अनुशासित प्रदर्शनका कारण खेल गोलरहित रह्यो।
दोस्रो हाफमा खेलको गति थप बढ्यो। स्पेनले लगातार दबाब सिर्जना गरिरहँदा अर्जेन्टिनाले पनि जवाफी आक्रमण गर्यो। तर ९० मिनेटसम्म कुनै टोलीले गोल गर्न नसकेपछि विश्वकपको उपाधि अतिरिक्त समयमा धकेलियो।
अतिरिक्त समयको पहिलो चरणमा स्पेनले अग्रता लिने सुनौलो अवसर गुमायो। निको विलियम्सको उत्कृष्ट क्रसमा मिकेल मेरिनो कुनै मार्किङबिनै हेड प्रहार गर्ने अवस्थामा पुगे पनि उनको प्रहार गोलपोस्टको बाहिरिएपछि अर्जेन्टिनाले राहतको सास फेर्यो।
तर खेलको १०६औँ मिनेटमा स्पेनले अन्ततः प्रतीक्षा समाप्त गर्यो। निको विलियम्सको चलाखीपूर्ण पासमा फेरान टोरेसले सन्तुलित प्रहार गर्दै अर्जेन्टिनाको जाली चुमाए। त्यो गोल नै अन्ततः फाइनलको निर्णायक क्षण बन्यो।
गोल खाएपछि अर्जेन्टिनाले सबै शक्ति लगाएर बराबरी गोलको खोजी गर्यो। कप्तान लियोनेल मेस्सीसहित टोलीका खेलाडीहरूले लगातार दबाब बनाए पनि स्पेनको सुदृढ रक्षापंक्ति र गोलरक्षकले कुनै अवसर सफल हुन दिएनन्। अन्तिम सिट्टी बज्नासाथ स्पेनका खेलाडी र समर्थक खुसीले उफ्रिए भने अर्जेन्टिनाका खेलाडी निराश बने।
खेलको अन्तिम समयमा तनाव पनि देखियो। हार नजिक पुगेको अर्जेन्टिनाका मिडफिल्डर लिएन्ड्रो परेडेस स्पेनका खेलाडीसँग विवादमा उत्रिएपछि केहीबेर मैदान तनावग्रस्त बन्यो। दुवै टोलीका खेलाडीबीच धकेलाधकेल भए पनि रेफ्री र अन्य खेलाडीको हस्तक्षेपपछि अवस्था सामान्य बनेको थियो।
यस जितसँगै स्पेनले सन् २०१० पछि पहिलो पटक तथा समग्रमा दोस्रो फिफा विश्वकप उपाधि जितेको छ। युवा र अनुभवी खेलाडीको उत्कृष्ट संयोजन, अनुशासित रणनीति र धैर्यपूर्ण प्रदर्शनले स्पेनलाई विश्व फुटबलको नयाँ सम्राट बनाएको हो।
यता साविक विजेता अर्जेन्टिनाको लगातार दोस्रो तथा समग्रमा चौथो विश्वकप उपाधि जित्ने सपना भने अधुरै रह्यो। लियोनेल मेस्सीको सम्भावित अन्तिम विश्वकप यात्रा उपाधिविहीन बने पनि अर्जेन्टिनाले प्रतियोगिताभर उत्कृष्ट संघर्ष गरेको प्रदर्शन स्मरणीय रहनेछ। तर फाइनलमा स्पेनको धैर्यता, रणनीतिक उत्कृष्टता र अतिरिक्त समयमा आएको एक निर्णायक गोलले विश्व फुटबलको इतिहासमा अर्को नयाँ अध्याय लेखिदियो।
