काठमाडौँ। फिफा विश्वकप २०२६ अन्तर्गत अन्तिम १६ को खेलमा नर्वेले पाँच पटकको विश्वविजेता ब्राजिललाई २-१ ले पराजित गर्दै विश्व फुटबलमा ठूलो सनसनी मच्चाएको छ।
एर्लिङ हालान्डको दोस्रो हाफमा गरेको दुई गोलको मद्दतमा नर्वे पहिलो पटक विश्वकपको क्वार्टरफाइनलमा पुगेको हो भने ब्राजिलको उपाधि यात्रा अप्रत्याशित रूपमा अन्त्य भएको छ। खेलको पहिलो हाफ गोलरहित बराबरीमा सकिएको थियो।
ब्राजिलले बलमा बढी नियन्त्रण राख्दै केही उत्कृष्ट अवसर सिर्जना गरे पनि त्यसलाई गोलमा परिणत गर्न सकेन। पहिलो हाफमै ब्रुनो गुइमाराएसले पाएको पेनाल्टी अवसर नर्वेका गोलरक्षक ओर्यान नाइलान्डले शानदार रूपमा बचाउँदै खेललाई बराबरीमा राखे।
दोस्रो हाफमा प्रशिक्षक कार्लो एन्सेलोट्टीले एन्ड्रिक र त्यसपछि नेयमारलाई मैदानमा उतारेर आक्रमणलाई धार दिने प्रयास गरे। तर खेलको निर्णायक क्षणमा नर्वेका स्टार स्ट्राइकर एर्लिङ हालान्ड चम्किए।
हालान्डले उत्कृष्ट हेडमार्फत नर्वेलाई अग्रता दिलाए। त्यसपछि निर्धारित समयको ९०औँ मिनेटमा पेनाल्टी क्षेत्रबाहिरबाट गरेको शक्तिशाली प्रहार गोलमा परिणत गर्दै व्यक्तिगत दोस्रो तथा टोलीका लागि दोस्रो गोल गरे। यो उनको यस विश्वकपको सातौँ गोल पनि हो।
इन्जुरी समयको अन्तिम क्षणमा ब्राजिलले पेनाल्टीको अवसर पायो। नर्वेका डिफेन्डर लियो ओस्टिगार्डले कासेमिरोलाई फाउल गरेको निर्णयपछि प्राप्त अवसरमा नेयमारले गोल गर्दै अन्तर २-१ मा झारे। त्यसअघि नाइलान्डले आफ्नै सहकर्मी क्रिस्टोफर आजेरको क्लियर गर्न खोजेको बल गोललाइनबाट अद्भुत रूपमा बचाउँदै नर्वेको अग्रता जोगाएका थिए।
तर बाँकी समयमा ब्राजिलले बराबरी गोल फर्काउन सकेन र अन्तिम सिटीसँगै पाँच पटकको विश्वविजेता टोली प्रतियोगिताबाट बाहिरियो। नर्वे भने इतिहासमै पहिलो पटक विश्वकपको क्वार्टरफाइनलमा प्रवेश गर्न सफल भयो।
हालान्डको ऐतिहासिक कीर्तिमान
ब्राजिलविरुद्धको दोहोरो गोलसँगै एर्लिङ हालान्डले अर्को उल्लेखनीय कीर्तिमान पनि आफ्नो नाममा लेखाएका छन्। उनले नर्वेका लागि लगातार १४ प्रतिस्पर्धात्मक अन्तर्राष्ट्रिय खेलमा गोल गर्ने दुर्लभ उपलब्धि हासिल गरेका छन्। यस अवधिमा उनले २६ गोल गरेका छन्।
हालान्डले नर्वेका लागि प्रतिस्पर्धात्मक अन्तर्राष्ट्रिय खेलमा पछिल्लोपटक अक्टोबर २०२४ मा अष्ट्रियाविरुद्धको युइएफए नेसन्स लिग खेलमा गोल गर्न सकेका थिएनन्। त्यसयता उनले खेलेका हरेक प्रतिस्पर्धात्मक अन्तर्राष्ट्रिय खेलमा गोल गर्दै आफूलाई विश्व फुटबलका सबैभन्दा घातक स्ट्राइकरमध्ये एकका रूपमा स्थापित गरेका छन्।
यस खेलमा दुई गोल थपेपछि हालान्डको विश्वकप २०२६ मा गोल संख्या ७ पुगेको छ। अब उनी किलियन एम्बाप्पे र लियोनेल मेस्सीसँगै समान ७-७ गोलका साथ गोल्डेन बुटको दौडमा संयुक्त शीर्ष स्थानमा छन्।
क्वार्टरफाइनलमा पनि यही लय कायम राख्न सके हालान्डले नर्वेलाई थप इतिहास रचाउने मात्र होइन, व्यक्तिगत रूपमा गोल्डेन बुट जित्ने सम्भावना पनि बलियो बनाउनेछन्।
अब नर्वेले क्वार्टरफाइनलमा मेक्सिको र इंग्ल्यान्डबीचको विजेतासँग प्रतिस्पर्धा गर्नेछ। ब्राजिललाई स्तब्ध पार्दै इतिहास रचेको नर्वे उपाधि यात्रालाई अझ लामो बनाउने लक्ष्यसहित अन्तिम आठको खेलमा उत्रिनेछ।
ब्राजिलविरुद्ध नर्वेको ऐतिहासिक अपराजित यात्रा कायम
ब्राजिललाई २-१ ले पराजित गरेसँगै नर्वेले विश्व फुटबलमा आफ्नो अर्को दुर्लभ कीर्तिमानलाई पनि निरन्तरता दिएको छ। नर्वे ब्राजिलले अहिलेसम्म सामना गरेका टोलीमध्ये कहिल्यै पराजित गर्न नसकेको एकमात्र राष्ट्र बनेको छ।
दुई देशबीच हालसम्म भएका पाँच प्रतिस्पर्धात्मक भेटमा नर्वेले तीन खेल जितेको छ भने दुई खेल बराबरीमा टुंगिएका छन्। अर्थात्, ब्राजिलले नर्वेविरुद्ध अहिलेसम्म एक खेल पनि जित्न सकेको छैन।
विश्वकपमा पनि नर्वेले ब्राजिलमाथि आफ्नो प्रभाव कायम राखेको छ। सन् १९९८ को विश्वकप समूह चरणमा नर्वेले ब्राजिललाई २-१ ले हराएको थियो।
त्यसको २८ वर्षपछि विश्वकप २०२६ को अन्तिम १६ मा पनि उही २-१ को नतिजा दोहोरिँदा नर्वेले ब्राजिललाई प्रतियोगिताबाट बाहिर पठाउँदै इतिहासमै पहिलो पटक क्वार्टरफाइनलमा स्थान सुरक्षित गरेको छ।
ब्राजिलजस्तो पाँच पटकको विश्वविजेता टोलीविरुद्ध लामो समयसम्म अपराजित रहनु नर्वेका लागि विश्व फुटबलकै सबैभन्दा उल्लेखनीय तथ्यांकमध्ये एक मानिएको छ।
