काठमाडौँ । अमेरिका, क्यानाडा र मेक्सिकोमा संयुक्त रूपमा भइरहेको फिफा विश्वकप फुटबलको नकआउट चरण रोचक मोडमा पुगेको छ।
अन्तिम ३२ को १२ खेल सम्पन्न भएसँगै १२ टोलीले प्रिक्वार्टरफाइनलमा स्थान सुरक्षित गरेका छन् भने बाँकी चार खेलले अन्तिम १६ टोलीको समीकरण टुंग्याउनेछ।
यस संस्करणमा पहिलो पटक ४८ टोली सहभागी भएकाले प्रतियोगिताको संरचना पनि फरक छ। समूह चरणबाट १६ टोली बाहिरिएपछि ३२ टोली नकआउट चरणमा पुगेका थिए। अब यस चरणबाट पनि १६ टोली बाहिरिने भएकाले प्रत्येक खेल ‘गर या मर’को अवस्थामै भइरहेको छ।
हालसम्म सहआयोजक क्यानाडासहित ब्राजिल, पाराग्वे, मोरक्को, नर्वे, फ्रान्स, मेक्सिको, इङ्गल्याण्ड, बेल्जियम, अमेरिका, स्पेन र पोर्चुगलले अन्तिम १६ मा स्थान बनाएका छन्। यी टोलीमध्ये केहीले सहज जित निकाले भने केहीले पेनाल्टी सुटआउटको रोमाञ्चक प्रतिस्पर्धापछि मात्र यात्रा अगाडि बढाउन सफल भए।
क्यानाडाले दक्षिण अफ्रिकालाई १-० ले पराजित गर्दै घरेलु समर्थकमाझ उत्साह थपेको छ भने ब्राजिलले जापानमाथि २-१ को संघर्षपूर्ण जित निकाल्यो।
पाराग्वेले जर्मनीलाई र मोरक्कोले नेदरल्यान्ड्सलाई पेनाल्टी सुटआउटमा पराजित गर्दै प्रतियोगिताका ठूला उलटफेरमध्येका नतिजा दिएका छन्। यसले विश्व फुटबलमा परम्परागत शक्तिशाली राष्ट्रहरूविरुद्ध नयाँ चुनौती प्रस्तुत गर्ने टोलीहरूको क्षमता थप स्पष्ट पारेको छ।
नर्वेले आइभरी कोस्टलाई २–१ ले हरायो भने फ्रान्सले केलियन एम्बाप्पेको दुई गोलको मद्दतमा स्वीडेनलाई ३-० ले पराजित गर्दै आफ्नो उपाधि दाबेदारीलाई थप बलियो बनाएको छ।
यस्तै मेक्सिकोले इक्वेडरलाई २-०, इङ्गल्याण्डले डीआर कंगोलाई २-१, बेल्जियमले सेनेगललाई ३-२, अमेरिकाले बोस्निया एन्ड हर्जगोभिनालाई २-१, स्पेनले अस्ट्रियालाई ३-० तथा पोर्चुगलले क्रोएसियालाई २-१ ले पराजित गर्दै प्रिक्वार्टरफाइनल यात्रा तय गरेका छन्।
अब बाँकी रहेका चार खेलले अन्तिम १६ टोलीको सूची पूरा गर्नेछन्। शुक्रबार बिहान स्वीट्जरल्याण्ड र अल्जेरिया, अष्ट्रेलिया र इजिप्ट तथा शनिबार अर्जेन्टिना–केप भर्डे र कोलम्बिया–घाना भिड्ने तालिका छ। यी खेलको नतिजापछि प्रिक्वार्टरफाइनलको सम्पूर्ण समीकरण सार्वजनिक हुनेछ।
प्रतियोगिताको हालसम्मको अवस्थाले विश्व फुटबलमा प्रतिस्पर्धा झन् सन्तुलित बन्दै गएको संकेत गरेको छ। स्थापित टोलीहरूले अपेक्षित प्रदर्शन गरे पनि पाराग्वे र मोरक्कोजस्ता टोलीले बलिया प्रतिद्वन्द्वीलाई बाहिर निकाल्दै यस संस्करणलाई थप रोमाञ्चक बनाएका छन्।
अब नकआउट चरण अगाडि बढ्दै जाँदा हरेक खेल उपाधि यात्राको निर्णायक परीक्षा बन्ने निश्चित देखिन्छ।
