काठमाडौँ । फिफा विश्वकप २०२६ को समूह ‘बी’ अन्तर्गत कतारले इन्जुरी समयमा गोल गर्दै स्वीट्जरल्यान्डसँग १-१ को रोमाञ्चक बराबरी खेलेको छ। हारको मुखमा पुगेको कतारले अन्तिम क्षणमा गोल गर्दै महत्वपूर्ण एक अंक जोगाएको हो।
खेलको अधिकांश समय स्वीट्जरल्यान्डले नियन्त्रणमा राखेको थियो। पहिलो हाफमा कतारका गोलरक्षक महमुद अबुनादाले रेमो फ्रेयुलरलाई पेनाल्टी क्षेत्रमा लडाएपछि प्राप्त पेनाल्टीलाई ब्रिल एम्बोलोले गोलमा परिणत गर्दै स्वीट्जरल्यान्डलाई अग्रता दिलाएका थिए। उक्त पेनाल्टी निर्णयमा अफसाइडको विवाद पनि भएको थियो।
स्वीट्जरल्यान्डले त्यसपछि लगातार आक्रमण गर्दै धेरै अवसर सिर्जना गर्यो। रुबेन भार्गास, मिचेल एबिस्चर र अन्य खेलाडीले थप गोलका अवसर पाए पनि त्यसलाई सदुपयोग गर्न सकेनन्। कतारका गोलरक्षक अबुनादाले पनि केही महत्वपूर्ण बचाउ गरे।
खेल सकिन एक मिनेटभन्दा केही बढी समय बाँकी रहँदा कतारले उत्कृष्ट क्रसमा शक्तिशाली हेडरमार्फत गोल गर्दै १–१ को बराबरी गर्यो। यो गोलसँगै रंगशालामा रहेका कतारी समर्थक खुसीले उफ्रिए भने स्वीट्जरल्यान्ड स्तब्ध बन्यो।
रेफ्रीले खेल समाप्तिको सिट्टी बजाएलगत्तै गोलरक्षक अबुनादा घुँडा टेकेर मैदानमै खुसी मनाए भने बेन्चमा रहेका कतारका खेलाडी र प्रशिक्षक टोली मैदानमा दौडिएर उत्सव मनाउन पुगे।
सन् २०२२ मा आफ्नै भूमिमा भएको विश्वकपमा समूह चरणका तीन ओटै खेल हारेको कतारका लागि यो बराबरी निकै महत्वपूर्ण बनेको छ।
अर्कोतर्फ, खेलभरि दबाब बनाएर पनि जित सुरक्षित गर्न नसकेको स्वीट्जरल्यान्डले अन्तिम समयमा दुई महत्वपूर्ण अंक गुमाएको छ।
