असोजअगावै मुस्ताङको स्याउ टिप्न नपाइने भएको छ । जिल्ला समन्वय समिति मुस्ताङद्वारा आयोजित स्याउ टिप्ने मिति तय गर्ने बैठकमा यस्तो निर्णय लिइएको हो ।
जिल्ला समन्वय समिति प्रमुख माया गुरुङको अध्यक्षतामा जिल्लास्थित ५ वटै स्थानीय तहका जनप्रतिनिधि, प्रमुख जिल्ला अधिकारी जनकराज पन्त, सम्बन्धित कार्यालयका प्रमुख एवंं प्रतिनिधि र मुस्ताङ जिल्लाका अगुवा स्याउ किसानको संयुक्त बैठकले मुस्ताङमा उच्च घनत्व प्रविधिमा आधारित (हाइब्रिड) जातका गाला र किङ रोट रेड डेलिसियस प्रजातिका स्याउबाहेक अन्य स्याउ असोजअघि टिप्न नपाइने निर्णय गरिएको हो ।
जिल्ला समन्वय समितिको अगुवाईमा भएको बैठकले गाला प्रजातिको स्याउ भदौ १० गतेदेखि, किङ रोट रेडडेलिसियस प्रजातिको स्याउ भदौ १५ गतेदेखि मात्रै टिप्न पाइने निर्णय भएको प्रधानमन्त्री कृषि आधुनिकीकरण परियोजना परियोजना कार्यान्वयन इकाइ मुस्ताङका कार्यालय प्रमुख नेत्रप्रसाद भट्टले जानकारी दिए ।
