काठमाडौँ । प्रतिनिधिसभा सदस्यको निर्वाचनका लागि समानुपातिक निर्वाचन प्रणालीअन्तर्गत राजनीतिक दलहरूले पेस गरेको बन्दसूचीमा पुरुषको तुलनामा महिलाको सङ्ख्या बढी रहेको पाइएको छ ।
निर्वाचन आयोगले सार्वजनिक गरेको विवरणअनुसार समानुपातिक निर्वाचन प्रणालीतर्फको अन्तिम बन्दसूचीमा एक हजार सात सय ७२ जना महिला उम्मेद्वार समावेश छन्। यस्तै, एक हजार तीन सय ६३ जना पुरुष उम्मेद्वार छन्।
समानुपातिकतर्फ कूल ६३ ओटा राजनीतिक दल सहभागी भएका छन् भने आयोगले ५७ ओटा निर्वाचन चिन्ह कायम गरेको जनाएको छ ।
अन्तिम बन्दसूचीअनुसार समानुपातिक प्रणालीतर्फ कूल तीन हजार एक सय ३५ जना उम्मेद्वार कायम भएका छन्।
निर्वाचन आयोगले प्रतिनिधिसभा सदस्य निर्वाचन ऐन, २०७४ को दफा २९ तथा प्रतिनिधिसभा सदस्य निर्वाचन नियमावली, २०७४ को नियम १६ को उपनियम (२) बमोजिम अन्तिम नामावली प्रकाशन गरेको हो।
यसअघि आयोगले विभिन्न कारण देखाउँदै ७६ जना उम्मेद्वारको नाम बन्दसूचीबाट हटाएको थियो।
आयोगका अनुसार कर्जा सूचना केन्द्रको कालोसूचीमा परेका २१ जना र प्रदेशसभाको समानुपातिक निर्वाचन प्रणालीतर्फको बन्दसूचीमा नाम समावेश भइसकेका २५ जना उम्मेद्वारको नाम हटाइएको छ।
यस्तै, तोकिएको जरिवाना भुक्तान नगरेका १० जना, मतदाता नामावलीमा पिछडिएको क्षेत्रमा नपरेका एक जना उम्मेद्वारलाई पनि बन्दसूचीबाट हटाइएको आयोगले जनाएको छ।
यसका साथै, सम्बन्धित राजनीतिक दलको अनुरोधमा १० जना उम्मेद्वारको नाम पनि बन्दसूचीबाट हटाइएको आयोगले जानकारी दिएको छ।
निर्वाचन आयोगका अनुसार समानुपातिक बन्दसूचीमा महिलाको सङ्ख्या बढी हुनु समावेशी प्रतिनिधित्वको दृष्टिले सकारात्मक मानिएको छ।
आयोगले आगामी निर्वाचन प्रक्रिया निष्पक्ष, पारदर्शी र कानूनअनुसार सम्पन्न गराउन सबै तयारी तीव्र पारेको जनाएको छ।
