काठमाडौँ। नेपाली बजारमा साताको अन्तिम दिन शुक्रबार पनि सुनचाँदीको भाउमा भारी वृद्धि भएको छ ।
बिहीबार तोलामा छ हजार दुई सयले बढेको सुनको भाउ शुक्रबार सात हजार दुई सयले बढेको हो। योसँगै सुनको भाउ दुई दिनमै तोलामा १३ हजार चार सय रुपैयाँ बढेको हो ।
मूल्य बढेसँगै शुक्रबार छापावाला सुनको भाउ दुई दुई लाख ९० हजार सात सय रुपैयाँ कायम भएको नेपाल सुनचाँदी रत्न तथा आभूषण महासंघले जनाएको छ ।
यसअघि सुनको भाउ बिहीबार दुई लाख ८३ हजार पाँच सय र बुधबार दुईलाख ७७ हजार तीन सय रुपैयाँ रहेको थियो ।
यता, शुक्रबार असली चाँदीको भाउ पनि तोलामा एक सय ६५ रुपैयाँ बढेर प्रतितोला चार हजार छ सय १५ रुपैयाँ पुगेको महासंघले जनाएको छ ।
यसअघि बिहीबार चाँदी प्रतिताला चार हजार चार सय ५० रुपैयाँमा कारोबार भएको थियो ।
सुनचाँदीको मूल्य हालसम्मकै उच्च गत माघ १५ गते भएको थियो ।
उक्त दिनमा सुन प्रतितोला तीन लाख ३९ हजार तीन सय र चाँदी सात हजार पाँच सय पाँच रुपैयाँमा कारोबार भएको थियो।
अन्तर्राष्ट्रिय बजारमा आएको उतारचढावका कारण स्थानीय बजारमा पनि सुनको मूल्य प्रभावित भएको बजार विश्लेषकहरूको दाबी छ ।
अन्तर्राष्ट्रिय बजारमा हुने उतारचढावका आधारमा नेपालमा महासंघले दैनिक रूपमा सुन तथा चाँदीको कारोबार मूल्य तोक्दै आएको छ।
