काठमाडौँ। फिफा विश्वकप २०२६ को दोस्रो दिन सह-आयोजक क्यानडाले आफ्नो पहिलो खेलमा बोस्निया एन्ड हर्जगोभिनासँग १-१ को बराबरी खेलेको छ । टोरन्टोस्थित बीएमओ फिल्डमा भएको प्रतिस्पर्धात्मक खेलमा क्यानडाले दोस्रो हाफमा उत्कृष्ट पुनरागमन गर्दै एक अंक सुरक्षित गरेको हो।
बोस्नियाले २१औँ मिनेटमा जोभो लुकिचको हेड गोलमार्फत अग्रता लिएको थियो । सेड कोलाशिनाकको कर्नरलाई सदुपयोग गर्दै लुकिचले विश्वकपमा आफ्नो पहिलो गोल गरेका थिए। पहिलो हाफमा बोस्निया हाबी देखिए पनि दोस्रो हाफमा क्यानडाले खेलको गति परिवर्तन गर्यो।
प्रशिक्षक जेसी मार्शले गरेका रणनीतिक परिवर्तन प्रभावकारी बन्दा क्यानडाले लगातार दबाब सिर्जना गर्यो। त्यसको फलस्वरूप साइल लारिनले उत्कृष्ट फिनिसिङ गर्दै बराबरी गोल फर्काए।
अन्तिम मिनेटसम्म क्यानडाले विजयी गोलको प्रयास गरे पनि बोस्नियाले थप क्षति हुन दिएन। यस नतिजासँगै दुवै टोलीले समूह चरणमा १-१ अंक बटुलेका छन्।
खेल अत्यन्तै प्रतिस्पर्धात्मक रह्यो, जसमा क्यानडाका २ तथा बोस्निया एन्ड हर्जगोभिनाका ३ खेलाडीले पहेँलो कार्ड पाए ।
पहिलो हाफमा बोस्निया हाबी भए पनि दोस्रो हाफमा क्यानडाले खेलमा पुनः नियन्त्रण बनाउँदै बराबरी नतिजा निकाल्न सफल भयो ।
विस्तारित विश्वकप ढाँचाअनुसार शीर्ष दुई टोलीसँगै उत्कृष्ट आठ तेस्रो स्थानका टोली पनि नकआउट चरणमा पुग्ने भएकाले दुवै टोलीको अर्को चरण पुग्ने सम्भावना कायमै छ।
आजै अमेरिका-पाराग्वेसँग प्रतिस्पर्धा
यसैबीच, अर्को सहआयोजक अमेरिका (यूएसए) ले आफ्नो पहिलो खेलमा पाराग्वेको सामना गर्ने भएको छ। लस एन्जलस बाहिरको सोफी स्टेडियममा हुने उक्त खेल नेपाली समय अनुसार बिहान ६:४५ बजे हुनेछ।
विश्वकपको उद्घाटन दिन मेक्सिकोले दक्षिण अफ्रिकालाई २-० ले पराजित गरेको थियो भने दक्षिण कोरियाले चेक गणतन्त्रमाथि २-१ को जित निकालेको थियो। प्रतियोगिताको दोस्रो दिन पनि रोमाञ्चक प्रतिस्पर्धाले समर्थकलाई उत्साहित बनाएको छ।
