काठमाडौँ। नेपाली बजारमा साताको अन्तिम दिन शुक्रबार पनि सुनचाँदीको भाउमा गिरावट आएको छ।
बिहीबारको तुलनामा शुक्रबार सुनको भाउ तोलामा दुई हजार दुई सय र चाँदीको ७५ रुपैयाँ घटेको हो ।
मूल्य घटेसँगै शुक्रबार छापावाला सुन प्रतितोला दुई लाख ९६ हजार पाँच सय रुपैयाँमा कारोबार भइरहेको नेपाल सुनचाँदी रत्न तथा आभूषण महासंघले जनाएको छ ।
यसअघि बिहीबार सुनको भाउ प्रतितोला दुई लाख ९८ हजार सात सय रुपैयाँ रहेको थियो ।
यता बिहीबार प्रतितोला पाँच हजार २० रुपैयाँमा कारोबार भएको असली चाँदीको भाउ शुक्रबार घटेर चार हजार नौ सय ४५ रुपैयाँ कायम भएको महासंघलले जनाएको छ ।
बिहीबार पनि सुनको भाउ तोलामा एक हजार आठ सय र चाँदीको एक सय १० रुपैयाँले घटेको थियो ।
सुनचाँदीको मूल्य हालसम्मकै उच्च गत माघ १५ गते भएको थियो । उक्त दिनमा सुन प्रतितोला तीन लाख ३९ हजार तीन सय र चाँदी सात हजार पाँच सय पाँच रुपैयाँमा कारोबार भएको थियो ।
अन्तर्राष्ट्रिय बजारमा आएको उतारचढावका कारण स्थानीय बजारमा पनि मूल्य प्रभावित भएको हो। केही दिनयता लगातार बढिरहेको सुनको मूल्यमा हिजो र आजको गिरावटले उपभोक्तालाई केही राहत दिएको छ।
