आजको पञ्चाङ्ग
मिति २०८३ कार्तिक १२ गते बिहीबार, इस्वीसंवत अक्टोबर २९ तारिक सन् २०२६, श्रीशाके १९४८, नेपाल संवत् ११४६, रौद्रनामको संवत्सरः, सूर्य पृथ्वीको दक्षिणी गोलार्द्धमा छन्। शरद ऋतु चलिरहेको छ। चान्द्रमान अनुसार कार्तिककृष्णपक्ष चलिरहेको छ। आज कार्तिककृष्णपक्षको चतुर्थी तिथि रातिमा २ः१० बजेसम्म त्यसपछि पञ्चमी तिथि लाग्नेछ। नक्षत्रमा रोहिणी दिनमा ३ः३५ बजेसम्म त्यसपछि मृगशिरा नक्षत्र लाग्नेछ। विष्कुम्भादि योगमा वरियान ५ घटि ३७ पलासम्म त्यसपछि शिव योग लाग्नेछ। करणमा बब रहनेछ। आनन्दादि योगमा उत्पात रहनेछ।
सूर्य तुला राशिमा, चन्द्रमा वृष राशिमा रहनेछ। आज दिनमान २७ घटि ४९ पला अर्थात ११ घण्टा १० मिनेटको रहनेछ। आज सूर्योदय काठमाडौँ केन्द्र विन्दुमा रही बिहानमा ६ः१२ बजे तुरुदेव मुहूर्तमा हुनेछ भने सूर्यास्त साँझमा ठीक ५ः२० बजे हुनेछ। यस्तै, चन्द्रमा उदाउने समय साँझमा ७ः५५ बजे र अस्ताउने समय भोलि बिहानमा ९ः३५ बजे रहेको छ।
आजको राशिफल
मेषः आजको दिन धन र वाणीको प्रभाव बढ्ने समय छ। द्वितीय भावमा चन्द्रमाको गोचर रहने भएकाले आर्थिक रूपमा नयाँ अवसरहरू प्राप्त हुनेछन् र रोकिएको धन हात लाग्न सक्छ। व्यापार व्यवसायमा गरेको लगानीले राम्रो प्रतिफल दिनेछ। कला, सञ्चार वा वित्तीय क्षेत्रमा आबद्ध हुनुहुन्छ भने आज तपाईंको कार्यकुशलताको प्रशंसा हुनेछ। परिवारमा कुनै मांगलिक वा उत्सवमय वातावरण बन्न सक्छ। आज नातेदार वा नजिकका मित्रबाट सुखद सहयोग मिल्नेछ। बोलीमा मधुरता राख्दा सामाजिक सम्बन्ध अझ मजबुत हुनेछ।
वृषः आजको दिन ऊर्जावान् र उत्साहजनक रहनेछ। चन्द्रमा आफ्नै राशिमा रहेकाले मानसिक रूपमा नयाँ काम गर्ने सोच आउनेछ। कार्यक्षेत्रमा तपाईंको प्रभाव बढ्नेछ र रोकिएका अधुरा कामहरू सहजै पूरा हुनेछन्। आर्थिक तथा व्यापारिक दृष्टिकोणले नयाँ सम्झौता वा लगानीका लागि समय अनुकूल छ। प्रेम सम्बन्ध तथा दाम्पत्य जीवनमा मधुरता छाउनेछ। आज नयाँ जिम्मेवारी प्राप्त हुन सक्छ, त्यसैले निर्णय लिँदा आत्मविश्वास कायम राख्नुहोला। कुनै पनि कामको सुरुवातमा कुलदेवताको स्मरण गर्नु शुभ हुनेछ।
मिथुनः आज खर्च र स्वास्थ्यको मामिलामा विशेष ध्यान दिनुपर्नेछ। द्वादश भावको चन्द्रमाका कारण भौतिक सुखसाधन वा मनोरञ्जनमा अनावश्यक खर्च बढ्न सक्छ। व्यापार वा कार्यक्षेत्रमा नयाँ लगानी गर्दा वा उधारो लेनदेन गर्दा निकै सतर्क रहनुहोला। वैदेशिक कार्य वा दूरदराजको व्यापारमा जोडिनुभएकाहरूका लागि भने आज सकारात्मक फल मिल्नेछ। जीवनसाथी वा नजिकका साथीभाइसँग सामान्य कुरामा मनमुटाव हुन सक्ने भएकाले वाणीमा नियन्त्रण राख्नुहोला। यात्रा गर्दा सावधानी अपनाउनुहोला।
कर्कटः आजको दिन निकै भाग्यशाली र फलदायी रहनेछ। आय भावमा चन्द्रमा रहेकाले आम्दानीका नयाँ स्रोतहरू फेला पर्नेछन् र आर्थिक स्थिति बलियो बन्नेछ। लामो समयदेखि फसेको वा रोकिएको धन फिर्ता हुने योग छ। कार्यक्षेत्रमा वरिष्ठ अधिकारी र सहकर्मीहरूको पूर्ण सहयोग प्राप्त हुनाले कार्य सम्पादनमा सहजता आउनेछ। समाजमा मान–प्रतिष्ठा बढ्नेछ र साथीभाइसँगको भेटघाट सुखद रहनेछ। प्रेम जीवनमा नयाँ खुसी सञ्चार हुनेछ। आज आएका अवसरहरूलाई समयमै सदुपयोग गर्नुहोला।
सिंहः आज करियर र कार्यक्षेत्रमा ठूलो सफलता मिल्ने दिन छ। कर्म भावमा चन्द्रमा रहेकाले नोकरीमा पदोन्नति वा नयाँ र प्रतिष्ठित जिम्मेवारी पाउने सम्भावना रहन्छ। व्यापार व्यवसायमा नयाँ कार्ययोजना लागू गर्दा दीर्घकालीन फाइदा मिल्नेछ। सरकारी काम वा प्रशासनिक क्षेत्रका रोकिएका कामहरू आज छिट्टै फत्ते हुनेछन्। समाजमा तपाईंको कार्यकुशलताको प्रशंसा हुनेछ। बुबा वा घरका ज्येष्ठ सदस्यको सहयोग र मार्गदर्शनले ठूलो संकट टर्न सक्छ। कार्यव्यस्तताका कारण स्वास्थ्यमा भने केही थकान महसुस हुन सक्छ।
कन्याः आज भाग्यले साथ दिनेछ। रोकिएका र अड्किएका कामहरू भाग्यको बलले र ज्येष्ठ नागरिकको सहयोगमा सम्पन्न हुनेछन्। धार्मिक, आध्यात्मिक वा परोपकारी कार्यमा रुचि बढ्नुका साथै धार्मिक यात्राको योग पनि बन्नेछ। उच्च शिक्षा वा वैदेशिक रोजगारीको प्रयास गरिरहनुभएकाहरूका लागि आज कुनै सुखद समाचार प्राप्त हुन सक्छ। व्यापार व्यवसायमा क्रमिक सुधार आउनेछ। आज मनमा सकारात्मक विचारहरू आउनेछन् जसले गर्दा निर्णय लिने क्षमतामा वृद्धि हुनेछ।
तुलाः आज हरेक कार्यमा विशेष सावधानी र सतर्कता अपनाउनुपर्नेछ। अष्टम भावमा चन्द्रमा रहेकाले स्वास्थ्यमा केही गडबडी, विशेष गरी पेट वा नसा सम्बन्धी समस्याले सताउन सक्छ। आर्थिक कारोबार, धितोपत्र बजार वा कुनै पनि जोखिमपूर्ण क्षेत्रमा आज लगानी नगर्नु नै बुद्धिमानी हुनेछ। कार्यक्षेत्रमा सहकर्मीहरूसँग वादविवाद हुन सक्ने भएकाले आफ्नो काममा मात्र ध्यान दिनुहोला। हतारमा कुनै पनि नयाँ निर्णय नलिनुहोस् र सवारी साधन चलाउँदा वा यात्रा गर्दा ट्राफिक नियमको पूर्ण पालना गर्नुहोला।
वृश्चिकः आजको दिन दाम्पत्य सुख र साझेदारीको काममा सफलता मिल्नेछ। व्यापार व्यवसायमा साझेदारहरूसँगको समन्वय राम्रो हुनाले सोचेभन्दा बढी आर्थिक लाभ हुनेछ। नयाँ व्यावसायिक सम्झौताका लागि आजको दिन निकै उत्तम छ। कला, फेसन, चमकधमक वा सञ्चार क्षेत्रमा आबद्ध व्यक्तिहरूले आज विशेष पहिचान कमाउन सक्नेछन्। जीवनसाथी वा प्रेमी-प्रेमिकाको पूर्ण सहयोग र प्रेम प्राप्त हुनाले मन प्रसन्न रहनेछ। आज परिवारका साथ कुनै रमाइलो यात्रा वा रात्रिकालीन भोजनको अवसर मिल्न सक्छ।
धनुः आजको दिन प्रतिस्पर्धामा विजय प्राप्त गर्ने समय छ। छैटौँ भावको चन्द्रमाका कारण कार्यक्षेत्रमा रहेका शत्रु वा प्रतिस्पर्धीहरू स्वतः परास्त हुनेछन्। पुराना रोकिएका कानुनी वा अदालती मामिलाहरू तपाईंको पक्षमा आउने बलियो सम्भावना छ। ऋण वा बैंकिङ कारोबारको मामिला सुल्झाउन आजको दिन अनुकूल रहनेछ। मिहिनेत अनुसार कामको उचित परिणाम मिल्नेछ। स्वास्थ्यमा विगतमा देखिएका समस्याहरू बिस्तारै कम हुँदै जानेछन्। मामाघर पक्षबाट कुनै सहयोग वा खुसीको खबर मिल्न सक्छ।
मकरः आजको दिन बौद्धिक क्षमता प्रदर्शन गर्ने र रचनात्मक कार्यमा लाग्ने समय हो। विद्यार्थी वर्गका लागि अध्ययन अध्यापनमा विशेष रुचि बढ्नेछ र परीक्षा आदिमा राम्रो नतिजा हात लाग्नेछ। धितोपत्र वा चिठ्ठा जस्ता क्षेत्रबाट आकस्मिक आर्थिक लाभ हुन सक्छ। कला, लेखन वा सिर्जनात्मक क्षेत्रमा हुनुहुन्छ भने तपाईंको कामको सर्वत्र प्रशंसा हुनेछ। सन्तानको तर्फबाट सुखद समाचार सुन्न पाउनुहुनेछ। प्रेम सम्बन्धमा रहेकाहरूका लागि असमझदारीहरू हटेर सामिप्यता बढ्नेछ।
कुम्भः आज घरेलु मामिला र मानसिक शान्तिको विषयमा अलि बढी ध्यान दिनुपर्नेछ। चतुर्थ भावको चन्द्रमाका कारण घरपरिवारमा सम्पत्ति वा घरायसी विषयलाई लिएर सामान्य असमझदारी वा तनाव उत्पन्न हुन सक्छ। जग्गाजमिन वा सवारी साधन खरिदबिक्रीको योजना बन्न सक्छ, तर कागजातमा राम्रोसँग हस्ताक्षर गर्नुअघि विचार पु¥याउनुहोला। आमाको स्वास्थ्यमा केही कमजोरी देखिन सक्ने भएकाले हेरचाहमा कमी नगर्नुहोला। आज कार्यक्षेत्रमा पनि हतार नगरी धैर्यताका साथ काम गर्नु राम्रो हुनेछ।
मीनः आजको दिन पराक्रम र उत्साह बढ्ने समय छ। तृतीय भावको चन्द्रमाले गर्दा तपाईंमा नयाँ काम गर्ने साहस र आत्मविश्वास पलाउनेछ। दाजुभाइ, दिदीबहिनी वा नजिकका साथीभाइको पूर्ण सहयोगमा धेरै दिनदेखि रोकिएका कामहरू सफलतापूर्वक सम्पन्न हुनेछन्। छोटो दुरीको लाभदायक व्यावसायिक यात्राको योग छ, जसले भविष्यका लागि नयाँ ढोका खोल्नेछ। सामाजिक क्षेत्रमा तपाईंको सक्रियता र प्रतिष्ठा बढ्नेछ। कला र लेखनमा लागेकाहरूका लागि आजको दिन विशेष फलदायी रहनेछ।
