झापा । झापाको कन्काई नगरपालिका-२ स्थित एस फुल सेकुवा कर्नरबाट १०२.३१० ग्राम खैरो हेरोइनजस्तो पदार्थसहित दुई भारतीय नागरिक पक्राउ परेका छन्।
लागुऔषध नियन्त्रण ब्यूरो शाखा कार्यालय काँकडभिट्टा र इलाका प्रहरी कार्यालय सुरुङ्गाबाट खटिएको संयुक्त प्रहरी टोलीले लागुऔषध बिक्री-वितरण भइरहेको भन्ने विशेष सूचनाका आधारमा उनीहरूलाई पक्राउ गरेको हो।
पक्राउ पर्नेमा भारतको बिहार राज्य, अररिया जिल्ला, कुरसाकट्टा वडा नं. ७ तकियाटोल निवासी २८ वर्षीय महमद एहवाल र सोही जिल्लाको वडा नं. ८ छिप्टिया टोल निवासी २७ वर्षीय अझर अन्सारी रहेका छन्।
प्रहरीले उनीहरूको साथबाट १०२.३१० ग्राम खैरो हेरोइनजस्तो देखिने पदार्थ, ७ हजार २ सय वटा ट्रामाडोल क्याप्सुल र ७ हजार ४ सय ५० ओटा निटाजेन ट्याब्लेट बरामद गरेको जनाएको छ।
यस्तै, दुई थान एन्ड्रोइड मोबाइल फोन पनि बरामद गरिएको छ। पक्राउ परेका दुवै जनामाथि लागुऔषध सम्बन्धी कसुरमा थप अनुसन्धान भइरहेको प्रहरीले जनाएको छ।
