काठमाडौँ। देशभर मनसुनी प्रणाली सक्रिय बनेसँगै आज पनि विभिन्न प्रदेशमा भारी वर्षाको सम्भावना देखिएको छ।
मौसम पूर्वानुमान महाशाखाले विशेषगरी लुम्बिनी र सुदूरपश्चिम प्रदेशका पहाडी तथा तराई क्षेत्र, साथै बागमती, गण्डकी र कर्णाली प्रदेशका पहाडी भागका एक/दुई स्थानमा भारी वर्षा हुन सक्ने जनाएको छ।
महाशाखाका अनुसार आज राति पनि बागमती, गण्डकी र लुम्बिनी प्रदेशका पहाडी तथा तराई क्षेत्रका केही स्थानमा ठूलो वर्षा हुने सम्भावना रहेकाले आवश्यक सतर्कता अपनाउनुपर्ने अवस्था छ।
यस्तै, देशका हिमाली क्षेत्रका थोरै स्थान र पहाडी क्षेत्रका केही स्थानमा मेघगर्जन तथा चट्याङसहित मध्यम वर्षा हुने अनुमान गरिएको छ।
हाल देशभर मनसुनी वायुको प्रभाव कायम रहेको छ भने मनसुनको न्यून चापीय रेखा औसत (सरदर) स्थानको आसपासमा रहेकाले आगामी केही दिनसम्म पनि वर्षाको क्रम जारी रहने संकेत देखिएको मौसमविद्हरूको भनाइ छ।
