काठमाडौँ । आईसीसी क्रिकेट विश्वकप लिग-२ अन्तर्गत नेपालले आज नेदरल्यान्ड्समा आफ्नो महत्त्वपूर्ण अभियानको शुरूआत गर्दै नामिबियासँग प्रतिस्पर्धा गर्दैछ। नेपाली समयअनुसार दिउँसो पौने ३ बजे हुने यो खेल नेपालका लागि केवल दुई अंकको लडाइँ मात्र होइन, सन् २०२७ को एकदिवसीय विश्वकप छनोट यात्रालाई बलियो बनाउने अवसर पनि हो।
आयोजक नेदरल्यान्ड्स, नेपाल र नामिबिया सहभागी त्रिदेशीय शृङ्खलामा नेपालले कुल चार खेल खेल्नेछ। आज नामिबियासँग भिडेपछि साउन ७ गते नेदरल्यान्ड्ससँग, साउन ११ गते पुनः नामिबियासँग र साउन १३ गते फेरि नेदरल्यान्ड्ससँग प्रतिस्पर्धा गर्ने तालिका छ।
हाल लिग-२ को अंकतालिकामा नेपाल २४ अंकसहित पाँचौँ स्थानमा छ। शीर्ष चारमा अमेरिका, स्कटल्यान्ड, नेदरल्यान्ड्स र ओमान छन् भने नामिबिया २२ अंकसहित सातौँ स्थानमा रहेको छ।
नेपालका लागि बाँकी आठै खेल निर्णायक मानिएका छन्, किनकि शीर्ष चारभित्र रहन सके विश्वकप ग्लोबल क्वालिफायरमा स्वतः स्थान सुनिश्चित हुनेछ। त्यसैगरी शीर्ष ६ मा रहे मात्र एकदिवसीय अन्तर्राष्ट्रिय मान्यता सुरक्षित रहने भएकाले प्रत्येक खेलको महत्त्व झन् बढेको छ।
नेपाल पछिल्लो समय उत्कृष्ट लयमा देखिएको छ। कीर्तिपुरमा सम्पन्न अघिल्लो लिग-२ शृङ्खलामा नेपालले आठमध्ये ६ खेल जित्दै अंकतालिकामा उल्लेखनीय सुधार गरेको थियो। त्यही आत्मविश्वासलाई निरन्तरता दिन सके शीर्ष चारको दौड थप रोमाञ्चक बन्न सक्छ।
यद्यपि, चुनौती सहज छैन। नेदरल्यान्ड्सको मौसम, पिचको अवस्था र युरोपेली परिस्थितिमा आफूलाई छिट्टै अभ्यस्त बनाउनु नेपाली टोलीका लागि ठूलो परीक्षा हुनेछ। नामिबिया पनि अनुभवी र प्रतिस्पर्धी टोली भएकाले पहिलो खेलमै सकारात्मक नतिजा निकाल्नु नेपालको अभियानका लागि अत्यन्त महत्वपूर्ण हुनेछ।
कप्तान रोहितकुमार पौडेलको नेतृत्वमा रहेको १५ सदस्यीय नेपाली टोलीमा अनुभवी र युवा खेलाडीको सन्तुलित संयोजन छ। शीर्षक्रमका ब्याटरहरूले जिम्मेवारीपूर्ण प्रदर्शन गर्न सके र बलिङ आक्रमणले विपक्षीलाई दबाबमा राख्न सके नेपालले विजयी सुरुआत गर्ने सम्भावना बलियो छ।
विश्वकप लिग-२ को अन्तिम चरणमा प्रवेश गरिरहेको अवस्थामा अब प्रत्येक खेल नेपालका लागि ‘फाइनल’ सरह बनेको छ। त्यसैले आजको नामिबियाविरुद्धको प्रतिस्पर्धा केवल शृङ्खलाको पहिलो खेल नभई विश्वकप छनोटको सम्भावनालाई अझ बलियो बनाउने निर्णायक अवसरका रूपमा हेरिएको छ।
