काठमाडौँ । विश्वकप २०२६ अन्तर्गत समूह ‘जे’ को खेलमा पहिलो हाफसम्म अर्जेन्टिनाले अस्ट्रियाविरुद्ध १-० को अग्रता बनाएको छ, जसको केन्द्रमा कप्तान लियोनेल मेस्सीको ऐतिहासिक प्रदर्शन रहेको छ।
पहिलो हाफमा मेस्सीले पेनाल्टीबाट गोल गर्ने अवसर पाए पनि त्यसलाई सदुपयोग गर्न सकेनन्। तर त्यसको केही समयपछि उनले पेनाल्टी एरियाको बाहिरबाट उत्कृष्ट प्रहार गर्दै अर्जेन्टिनालाई अग्रता दिलाए।
उक्त गोलसँगै मेस्सी विश्वकप इतिहासकै सर्वाधिक गोलकर्ता बनेका छन्। उनले प्रतियोगितामा आफ्नो गोल संख्या १७ पुर्याउँदै नयाँ कीर्तिमान कायम गरेका हुन्।
मेस्सीको गोल नै पहिलो हाफको निर्णायक क्षण बनेको छ। अर्जेन्टिनाले अग्रता लिए पनि अस्ट्रियाले आक्रमण गर्ने प्रयास गरेको थियो। यद्यपि उनीहरू अर्जेन्टिनाको संगठित रक्षापंक्तिलाई तोड्न पर्याप्त गुणस्तर देखाउन सकेनन्। पहिलो हाफपछि अर्जेन्टिना १–० ले अगाडि छ।
मेस्सी सर्वाधिक गोलकर्ताको शीर्ष स्थानमा
अर्जेन्टिनाका कप्तान लियोनेल मेस्सीहाल जारी विश्वकप २०२६ मा सर्वाधिक गोलकर्ताको सूचीमा शीर्ष स्थानमा पुगेका छन्।
अस्ट्रियाविरुद्धको खेलमा ३९औँ मिनेटमा गोल गर्दै उनले यस प्रतियोगितामा आफ्नो गोल संख्या चार पुर्याएका छन्। उक्त गोलसँगै मेस्सी अहिलेका लागि सर्वाधिक गोलकर्ता बनेका छन्।
टूर्नामेन्टमा लगातार प्रभावशाली प्रदर्शन गर्दै आएका मेस्सीले समूह चरणमै महत्वपूर्ण योगदान दिइरहेका छन्। उनले गरेका गोलहरूले अर्जेन्टिनालाई खेलहरूमा अग्रता र निर्णायक स्थितिमा पुर्याउन सहयोग गरेको छ।
हालसम्मको तथ्यांकअनुसार उनी प्रतियोगिताको सर्वाधिक गोलकर्ताको सूचीमा शीर्ष स्थानमा रहेका छन्।
