काठमाडौँ। नेपाली कांग्रेसको दोस्रो विशेष महाधिवेशनको तयारी तीव्र रुपमा भइरहेको आयोजकले जनाएको छ ।
पुस २७ र २८ गते भृकुटीमण्डपमा हुन लागेको विशेष महाधिवेशनका लागि जिल्ला-जिल्लाबाट महाधिवेशन प्रतिनिधिहरू आउने क्रम जारी रहेको छ ।
आयोजक समूहले प्रतिनिधिहरूको सुविधा सुनिश्चित गर्न काठमाडौंका विभिन्न होटेलमा एक हजार पाँच सय कोठा छुट्टाइएको बताएको छ । एयरपोर्टदेखि ठमेलसम्मका विभिन्न होटलका कोठा बुक गरिएको हो ।
आवास तथा खानपान व्यवस्थापन समितिका संयोजक रमेश धमलाले महिला, ज्येष्ठ नागरिक र अपांगता भएका प्रतिनिधिहरूका लागि विशेष व्यवस्थासहित कोठाहरू बुक गरिएको बताए ।
काठमाडौँमा घर भएका वा आफन्तको घरमा बस्ने प्रतिनिधिहरूलाई सो अनुसार व्यवस्थापन गर्न अनुरोध गरिएकोसमेत उनले जानकारी दिए ।
सबैलाई शनिबारसम्म काठमाडौँमा आइपुग्न भनिएको छ । कांग्रेसलाई पुनःजागरण गर्नका लागि पनि विशेष महाधिवेशनले भूमिका खेल्ने भन्दै महामन्त्रीद्वय गगनकुमार थापा र विश्वप्रकाश शर्माले विशेष महाधिवेशन बोलाएका हुन् ।
पार्टीको विधानअनुसार महाधिवेशन बोलाएका उनीहरूको कार्यक्रम असफल बनाउन बहिर्गमन नजिक पुगेका सभापति शेरबहादुर देउवाले आफू निकटको नेतृत्वमा रहेका संघ संगठनका नेतृत्वलाई उचालिरहेका छन् ।
विधानअनुसार कांग्रेसको विशेष महाधिवेशन पुस २९ भित्र भइसक्नुपर्छ । ५४ प्रतिशत महाधिवेशन प्रतिनिधिले विशेष महाधिवेशन माग्दै असोज २९ गते कार्यवाहक सभापति पूर्णबहादुर खड्कालाई हस्ताक्षर बुझाएका थिए ।
