पोखरा । नेपाली कम्युनिष्ट पार्टीका संयोजक पुष्पकमल दाहालले नेपाली कम्युनिष्ट पार्टी आफूहरूको आत्मसमीक्षाको परिणाम भएको बताएका छन् । आइतबार पोखरामा आयोजित सन्देश सभालाई सम्बोधन गर्दै उनले यस्तो बताएका हुन् ।
उनले अहिले नेपाली कम्युनिष्ट पार्टीले गरेको एकता सभा नेताहरूको आत्मालोचना भएको समेत जिकिर गरे । विगतमा भएका कमजोरीहरूप्रति आफूहरूले आत्मसमीक्षा गरेको भन्दै अब त्यस्तो गल्ती नदोहोर्याउने प्रतिवद्धता जनाए ।
यति ठूलो संख्यामा कम्युनिष्ट पार्टीहरू एकैसाथ एकीकृत भएको नेपालको इतिहासमै पहिलो घटना भएको दाबी संयोजक दाहालको छ । अब देशमा देखिएका समस्याहरू समाधान गर्नेमा केन्द्रित हुने बताए ।
पार्टीका सह-संयोजक तथा पूर्व प्रधानमन्त्री माधवकुमार नेपालले नेपाली कम्युनिष्ट पार्टी (नेकपा) जेनजीको आकर्षणको केन्द्र बनेको बताए ।
एसिड पीडित मुस्कान खातुनलगायतका जेनजी एकपछि अर्को गर्दै नेकपामा प्रवेश गरिरहेको भन्दै नेता नेपालले आफूहरूले जेनजीको भावनाको सम्मान गर्ने स्पष्ट पारे । जेनजीको नाममा भएको कुकर्मको दोषीलाई कारवाही गरिपर्नेमा उनले जोड दिए ।
नेता नेपालले पुरानो पार्टीमा रहेकाहरूले आफूलाई काम गर्न नदिएकोसमेत बताए । उनले भने, हिजो एकीकृत समाजवादी हुँदा मेरा खुट्टा भाँच्ने र तान्नेहरू थिए, अनि माओवादी हुँदा प्रचण्डको पार्टीमा बसेर खुट्टा तान्नेहरू पनि थिए, आज तिनीहरू भागेर गएका छन् । भाग्नेहरू, छाड्नेहरू जाउन् हामी प्रचण्ड, मलगायत एकताबद्द भएर अगाडि बढिरहन्छौं ।’
पार्टीका नेता झलनाथ खनालले कम्युनिष्ट क्रान्तिकारीहरू एकताबद्ध नभए देश समाप्त हुने खतरा रहेको औँल्याए । उनले भने,‘कम्युनिष्ट क्रान्तिकारीहरू एकता हुनुको विकल्प छैन । नभए देश समाप्त हुनसक्ने खतरा छ ।’
पूर्व प्रधानमन्त्री खनालले लामो समयसम्म शासन गर्दा पनि विगतका सरकारहरूले जनआकांक्षा पूरा नगरेकाले जेन-जी आन्दोलन भएको बताए ।
नेता भीम रावलले देश जलेपछि केपी ओलीले माफी माग्लान् भनेको त अझै दम्भ देखाइरहेको बताए । उनले भने, जेन-जीले लखेटे, देश संकटमा फस्यो, देशका धरोहरहरु सिंहदरबार, सर्वोच्च अदालतलगायत जलाइए ।
उनले भने,‘त्यसपछि आफै उपस्थित भएर, नभए पनि वक्तव्यमार्फत केपी ओलीले माफी माग्लान् भन्ने सोंचेको थिएँ तर फेरि पनि मैले केही गल्ती गरेको छैन भन्दै दम्भ देखाइरहेका छन् ।’
नेता नारायणकाजी श्रेष्ठले जेनजी विद्रोहले उठाएका एजेण्डालाई आत्मसाथ गर्न जरुरी रहेको बताए । जेन-जी विद्रोहका मागहरू जायज भएकाले आत्मसाथ गर्न जरुरी रहेको उनको भनाइ थियो ।
नेता श्रेष्ठले निर्वाचन सम्पन्न हरहालतमा गर्नु अहिलेको आवश्यक्ता रहेको बताए । समाजवादी क्रान्तिका लागि नेपाली कम्युनिष्ट पार्टीको आवश्यक्ता रहेको बताउँदै उनले भने,‘त्यसैले आफूलाई बदलौँ, नेताहरू बदलौँ र पार्टीलाई बदलौँ ।’
नेकपा नेता तथा पोखरा महानगरपालिकाका मेयर धनराज आचार्यले नेपाली कम्युनिष्ट पार्टीले विगतमा भएका कमजोरीहरू सच्याएर अघि बढ्ने विश्वास व्यक्त गरे ।
उनले पोखराको चिप्लेढुंगास्थित मानवअधिकार चोकमा पार्टीको कार्यक्रम गर्दा व्यवसायीलाई असर परेको गुनासो गरेको भन्दै अब आईन्दा यसलाई ख्याल गर्न पनि आग्रह गरे ।
पार्टीका नेता सोमबहादुर नेपालीले भ्रष्टाचारबिरुद्द र सुशासनको पक्षमा आफूहरूले आवाज उठाए पनि पूरा गर्न नसकेको अवस्थामा जेनजीहरूले दुई दिने आन्दोलनबाट सफलता प्राप्त गरेको भन्दै धन्यवाद दिए ।
कार्यक्रममा नेतृ गायत्री गुरुङले स्वागत तथा नेता श्रीनाथ बरालले सञ्चालन गरेका थिए ।
