काठमाडौँ । उज्यालो नेपाल पार्टीले यही मंसिर १७ गते ‘उज्यालो नेपाल पार्टी’ को औपचारिक घोषणा गर्ने भएको छ । प्रज्ञा भवन कमलादी काठमाडौँमा पार्टीको औपचारिक घोषणा कार्यक्रममा उर्जा मन्त्री कुलमान घिसिङ आफै सहभागी हुने बताइन्छ ।
पार्टी दर्तामा कुलमानको नाम कतै नजोडिए पनि पार्टीको संरक्षक कुलमान नै रहेको चर्चा हुँदै आएको छ ।
उज्यालो नेपाल पार्टीको दीर्घकालीन दृष्टि, मूल ध्येय र विस्तृत घोषणापत्र (२०८२, औपचारिक रूपमा सार्वजनिक गरिने भएको छ । जसमा पार्टीको सैद्वान्तिक दृष्टिकोण, प्राथमिकता र कार्ययोजनालाई स्पष्ट रुपमा प्रस्तुत गरिने तयारी छ ।
उज्यालो नेपाल पार्टी नेपालको संविधानका उपलब्धिलाई आत्मसात् गर्दै जनताको प्रतिस्पर्धात्मक बहुदलीय लोकतान्त्रिक शासन प्रणाली, नागरिक स्वतन्त्रता, मौलिक अधिकार, मानव अधिकार, बालिग मताधिकार, आवधिक निर्वाचन, प्रेस स्वतन्त्रता, निष्पक्ष र सक्षम न्यायपालिका र कानूनी राज्यको अवधारणा, प्रभावकारी सेवा प्रवाहलगायतका लोकतान्त्रिक मूल्य र मान्यतामा आधारित समाजवादप्रति प्रतिबद्ध रही समृद्ध राष्ट्र निर्माण गर्न दर्ता भएको बताइन्छ ।
कार्यक्रममा बृहत् जनसहभागिता रहने अपेक्षा राखिएको छ र सुरक्षा, सवारी तथा भीड व्यवस्थापनका तयारी लगभग अन्तिम चरणमा पुगेका छन् ।
उज्यालो नेपाल बनाउने अभियान सिंगो नेपालीको साझा अभियान भएको भन्दै हालैको जेन-जी आन्दोलनलाई पनि संस्थागत नगरे देशले थप आन्दोलनको भार थेग्न नसक्ने पनि पार्टीको भनाई छ ।
यसै सन्दर्भमा नेपालको संविधानको उपलब्धिहरूलाई आत्मसात् गर्दै राष्ट्रिय स्वतन्त्रता, सार्वभौमिकता, राष्ट्रिय एकता अक्षुण्ण राखी परिवर्तित सन्दर्भसहितको जनअपेक्षा र चाहनालाई पूरा गर्ने संकल्प गर्दै लोकतन्त्र, विधिको शासन, सामाजिक न्याय र सेवाप्रवाहमार्फत सामाजिक आर्थिक रुपान्तरण गर्न उज्यालो नेपाल पार्टी हालसालै दर्ता भएको हो ।
उज्यालो नेपाल पार्टीको मूल नारा, ‘उज्यालो भविष्यका लागि, उज्यालो नेपाल’ रहेको छ, जसले देशको राजनीतिक, आर्थिक र सामाजिक रूपान्तरणलाई एउटै साझा राष्ट्रिय लक्ष्यका रूपमा प्रतिविम्बित गर्दछ ।
