काठमाडौँ । पत्रकार किशोर श्रेष्ठलाई नेपाल प्रहरीको साइबर ब्यूरोले बोलाएको छ। कलाकार तथा राष्ट्रिय स्वतन्त्र पार्टी (रास्वपा) का नेता हिमेश पन्तले श्रेष्ठविरुद्ध जाहेरी दिएपछि अनुसन्धानका लागि ब्यूरोले बोलाएको हो।
पन्तले शुक्रबार श्रेष्ठविरुद्ध जाहेरी दिएका थिए। पन्तको परिवारले जग्गा कब्जा गरेको भन्ने विषयमा जनआस्था अनलाइनमा समाचार प्रकाशित भएपछि उनले जाहेरी दिएको बताइएको छ।
यसअघि पनि श्रेष्ठमाथि विभिन्न विषयमा आरोप लाग्दै आएका छन्। यद्यपि, ती आरोप र पछिल्लो जाहेरीका विषयमा सम्बन्धित निकायबाट हुने अनुसन्धान तथा निष्कर्षलाई अलग-अलग रूपमा हेर्नुपर्ने हुन्छ।
श्रेष्ठलाई पक्राउ गर्न खोजिएको भन्दै नेपाल पत्रकार महासंघका महासचिव रामप्रसाद दाहालले आपत्ति जनाएका छन्। उनले समाचारको विषयमा कारबाही गर्ने क्षेत्राधिकार प्रेस काउन्सिल नेपालको भएको उल्लेख गर्दै पत्रकारमाथि प्रहरीको हस्तक्षेप निन्दनीय भएको बताएका छन्।
‘जनआस्थामा छापिएको समाचारको विषयलाई लिएर प्रहरीले पत्रकार किशोर श्रेष्ठलाई पक्राउ गर्न खोज्नु निन्दनीय छ। समाचारको विषय हेर्ने क्षेत्राधिकार प्रेस काउन्सिल नेपालको हो भन्ने अहिलेको सरकारलाई जानकारी रहोस्,’ दाहालले सामाजिक सञ्जालमा लेखेका छन्।
यता, पत्रकार श्रेष्ठविरुद्ध जाहेरी दिएका पन्तमाथि पनि साइबर ब्यूरोमा उजुरी परेको छ। जनआस्था अनलाइनमा प्रकाशित समाचारलाई लिएर पत्रकारमाथि अश्लील गालीगलौज गर्दै फेसबुकमा आपत्तिजनक सामग्री पोस्ट गरेको आरोपमा उनीविरुद्ध विद्युतीय कारोबार ऐनबमोजिम कारबाहीको माग गर्दै उजुरी दर्ता गरिएको हो।
यससँगै श्रेष्ठ र पन्त दुवै पक्षसँग सम्बन्धित उजुरी प्रहरीको अनुसन्धानको विषय बनेका छन्।
