काठमाडौँ। बाढीपहिरोका कारण बागमती र गण्डकी प्रदेशका पाँच सडक खण्ड प्रभावित भएका छन्।
नेपाल प्रहरीले मंगलबार बिहानको विवरण सार्वजनिक गर्दै गोरखा-धादिङ जोड्ने सडक पूर्ण रूपमा अवरुद्ध रहेको र अन्य चार सडक खण्ड एकतर्फी सञ्चालनमा रहेको जनाएको छ।
गोरखाको आरुघाट गाउँपालिका-स्थित नयाँपुल सोतीमा रहेको फलामे पुल बाढीका कारण अवरुद्ध हुँदा गोरखाको आरुघाटबाट धादिङ जोड्ने सडक ठप्प भएको छ। असोज २५ गते बिहानदेखि अवरुद्ध सडक अझै सञ्चालनमा आउन सकेको छैन।
यसैगरी, धादिङको धुनिबेँसीस्थित खत्रीपौवामा पहिरो खसेपछि त्रिभुवन राजपथ एकतर्फी सञ्चालनमा रहेको छ।
गण्डकी प्रदेशमा पनि बाढीपहिरोले सडक यातायात प्रभावित भएको छ। म्याग्दीको रघुगंगा गाउँपालिका-२ बैसरीस्थित बेनी-जोमसोम सडक खण्ड पहिरोका कारण एकतर्फी सञ्चालनमा छ।
नवलपरासी पूर्वस्थित कालीगण्डकी करिडोरको जन्ती पहिरोमा पनि पहिरो खसेपछि सडक एकतर्फी मात्र सञ्चालन भइरहेको छ।
उक्त सडकमा ठूला सवारीसाधन चल्न नसकेको प्रहरीले जनाएको छ। त्यस्तै, मनाङ जोड्ने बेँसीसहर-खाङ्सार सडक खण्ड पनि बाढीका कारण एकतर्फी सञ्चालनमा रहेको छ।
प्रहरीका अनुसार अवरुद्ध तथा आंशिक रूपमा सञ्चालनमा रहेका सडक पूर्ण रूपमा खुलाउन प्रयास भइरहेको छ।
