काठमाडौँ। प्रधानमन्त्री वालेन्द्र साहले प्रहरी निरीक्षक आधारभूत तालिमको १८४औँ समूहका अधिकृतलाई कुनै पनि प्रकारको राजनीतिक दबाब र व्यक्तिगत स्वार्थमा नपरी कानूनको शासन कायम गर्न निर्देशन दिएका छन् ।
सोमबार राष्ट्रिय प्रहरी प्रशिक्षण प्रतिष्ठानमा आयोजित दीक्षान्त समारोहलाई सम्बोधन गर्दै प्रधानमन्त्री साहले प्रहरी सङ्गठनको छवि उच्च राख्न इमानदारी, अनुशासन र जवाफदेहितालाई कार्यसम्पादनको आधार बनाउनुपर्ने बताए ।
करिब १६ महिनाको कठिन तालिम पूरा गरेका अधिकृतलाई बधाई दिँदै उनले संविधान, प्रचलित कानून र नियमको पालना गरी निष्पक्ष रूपमा जिम्मेवारी निर्वाह गर्न आग्रह गरे ।
नागरिकको जिउधनको रक्षा, शान्ति सुरक्षा कायम र अपराध अनुसन्धान प्रहरीको प्रमुख जिम्मेवारी भएको उल्लेख गर्दै उनले त्यसमा कुनै सम्झौता नगर्न निर्देशन दिए ।
बदलिँदो अपराधको स्वरूपलाई ध्यानमा राख्दै अनुसन्धानलाई निष्पक्ष, वैज्ञानिक र प्रमाणमुखी बनाउन सूचना प्रविधिको उचित प्रयोग गर्नुपर्नेमा पनि प्रधानमन्त्रीले जोड दिए ।
प्रहरी सङ्गठनलाई आवश्यक स्रोतसाधन उपलब्ध गराउन सरकार प्रतिबद्ध रहेको उनले स्पष्ट पारे ।
प्रधानमन्त्री साहले तालिमबाट प्राप्त ज्ञान र सीपलाई व्यवहारमा उतार्दै नैतिकता, निष्ठा र पेशागत मर्यादा कायम गर्नुपर्ने बताए । अनुचित प्रभावमा नपरी निर्भीकताका साथ कर्तव्य निर्वाह गर्न उनले प्रहरी अधिकृतलाई आग्रह गरे ।
दीक्षान्त समारोहमा प्रहरी नेतृत्व तथा प्रशिक्षार्थीका अभिभावकको उपस्थिति थियो ।
तालिम पूरा गरेका अधिकृत अब देशका विभिन्न भागमा खटिएर प्रहरी सेवामा योगदान पुर्याउनेछन्।
