काठमाडौँ । आज अगस्ट १९ अर्थात् विश्व फोटोग्राफी दिवस। हरेक वर्ष अगस्ट १९ मा फोटोग्राफीको कला, इतिहास, प्रविधि र समाजमा यसको योगदानको सम्मान गर्दै यो दिवस मनाइन्छ।
फोटोग्राफीले महत्वपूर्ण घटना, मानिसका भावना, प्राकृतिक सौन्दर्य, संस्कृति र सामाजिक परिवर्तनका क्षणलाई तस्बिरमा सुरक्षित राख्दै आएको छ। एउटा प्रभावकारी तस्बिरले लामो विवरणले व्यक्त गर्न नसकेको कथा छोटो समयमै दर्शकसम्म पुर्याउन सक्छ।
पत्रकारितामा फोटोग्राफीको भूमिका अझ महत्वपूर्ण मानिन्छ। समाचारसँग सम्बन्धित घटनाको दृश्य प्रमाण प्रस्तुत गर्ने भएकाले फोटोले समाचारलाई थप प्रभावकारी र विश्वसनीय बनाउन सहयोग गर्छ।
विपद्, राजनीतिक गतिविधि, सामाजिक घटना, खेलकुद, कला तथा सांस्कृतिक गतिविधिलगायत विभिन्न क्षेत्रका महत्वपूर्ण क्षण फोटो पत्रकारले क्यामेरामा कैद गर्दै आएका छन्।
प्रविधिको विकाससँगै फोटोग्राफी पनि तीव्र रूपमा परिवर्तन भएको छ। मोबाइल फोन र डिजिटल क्यामेराको सहज पहुँचले आम मानिसलाई समेत महत्वपूर्ण क्षण अभिलेख गर्ने अवसर दिएको छ।
