पोखरा । तीज पर्व नजिकिँदै जाँदा नयाँ तीज गीत सार्वजनिक हुने क्रम तीव्र बनेको छ। यही क्रममा गायिका सरस्वती लामिछाने र गायक-सर्जक रामजी पौडेलको स्वर रहेको नयाँ तीज गीत ‘पैसा बिनाको’ सार्वजनिक गरिएको छ।
रामजी पौडेलको शब्द तथा संगीत रहेको गीतले आर्थिक अभाव, वैदेशिक रोजगारीको बाध्यता र त्यसले परिवारमा सिर्जना गर्ने भावनात्मक दूरीलाई मुख्य विषय बनाएको छ।
परम्परागत तीज गीतमा देखिने नाचगान र रमाइलोभन्दा फरक शैलीमा तयार गरिएको यस गीतले समाजको यथार्थलाई उठाउने प्रयास गरेको देखिन्छ।
गीतमा पैसा अभावका कारण परिवारले भोग्नुपर्ने समस्या, श्रीमान-श्रीमतीबीचको दूरी र गाउँघरको सामाजिक यथार्थलाई सरल भाषामा प्रस्तुत गरिएको छ। यसले मनोरञ्जनसँगै सामाजिक सन्देश दिन खोजेको अनुभूति हुन्छ।
गीतमा सरस्वती लामिछाने र रामजी पौडेलको स्वर सुहाउँदो देखिन्छ भने यम थापा मगरको संगीत संयोजनले लोकलयलाई आधुनिक शैलीसँग सन्तुलित रूपमा जोड्ने प्रयास गरेको छ। खड्क बजुराली (मालाश्री) ले मिक्सिङ तथा मास्टरिङ गरेका हुन्।
भिडियोतर्फ राम लामा र ममता पुनको अभिनय आकर्षक देखिन्छ। तारानाथ आचार्यको निर्देशन तथा सम्पादन, राम लामाको कोरियोग्राफी र अनिल कार्कीको छायांकनले गीतको कथावस्तुलाई प्रभावकारी ढंगले प्रस्तुत गर्न सहयोग गरेको छ।
दृश्य संयोजनले ग्रामीण परिवेश र कथाको भावलाई स्वाभाविक रूपमा देखाउने प्रयास गरेको छ।
सरस्वती लामिछाने युट्युब च्यानलमार्फत सार्वजनिक गरिएको ‘पैसा बिनाको’ ले तीज गीतलाई केवल मनोरञ्जनमा सीमित नराखी समसामयिक सामाजिक र आर्थिक यथार्थसँग जोड्ने प्रयास गरेको देखिन्छ। आगामी तीजमा दर्शक-श्रोताले यस गीतलाई कत्तिको अपनाउँछन् भन्ने भने समयसँगै स्पष्ट हुनेछ।
भिडियो
