काठमाडौँ। आईसीसी पुरुष क्रिकेट विश्वकप लिग-२ अन्तर्गत नेपालले आज घरेलु टोली नेदरल्यान्ड्ससँग प्रतिस्पर्धा गर्दैछ।
नेदरल्यान्ड्सको उट्रेचमा हुने खेल नेपाली समयअनुसार दिउँसो २:४५ बजे शुरू हुनेछ। लगातार तीन खेलमा हार बेहोरेको नेपाल आजको खेल जित्दै सिरिजको सुखद अन्त्य गर्ने लक्ष्यमा छ।
यसअघिका तीन खेल नेपालका लागि निराशाजनक रहे। पहिलो खेलमा नामिबियासँग ८ विकेटको हार बेहोरेको नेपाल दोस्रो खेलमा नेदरल्यान्ड्ससँग ६ विकेटले पराजित भयो।
तेस्रो खेलमा भने नेपाल जितको निकै नजिक पुगे पनि नामिबियासँग ३ रनको झिनो अन्तरले पराजित हुन पुग्यो। विशेषगरी निर्णायक समयमा ब्याटिङले साथ नदिँदा नेपालले लगातार अंक गुमाएको हो।
यो सिरिजमा नेपालको शीर्षक्रमले अपेक्षाअनुसार प्रदर्शन गर्न सकेको छैन। राम्रो शुरूआतलाई ठूलो साझेदारीमा रूपान्तरण गर्न नसक्नु, मध्यक्रममा लगातार विकेट गुम्नु र दबाबका बेला जिम्मेवारीपूर्वक इनिङ्स सम्हाल्न नसक्नु नेपालको मुख्य कमजोरी बनेको छ। बलिङतर्फ केही खेलाडीले प्रभाव छाडे पनि ब्याटरले दिएको कम लक्ष्य जोगाउन कठिन परेको देखिएको छ।
आजको खेल नेपालका लागि केवल दुई अंकको लडाइँ मात्र होइन, आत्मविश्वास पुनःस्थापित गर्ने अवसर पनि हो। लगातार हारले विश्वकप छनोटको यात्रालाई थप चुनौतीपूर्ण बनाएको अवस्थामा आजको जितले टोलीको मनोबल उकास्नुका साथै आगामी सिरिजका लागि सकारात्मक सन्देश दिनेछ।
अंकतालिकामा नेपाल अहिले ३१ खेलबाट ११ जित र १८ हारसहित २४ अंक जोडेर पाँचौं स्थानमा रहेको छ। घरेलु टोली नेदरल्यान्ड्स भने ३० खेलबाट १६ जित र १० हारसहित ३६ अंकका साथ तेस्रो स्थानमा छ।
नेपालले आज जित निकाले २६ अंक पुर्याउनेछ र अंकतालिकामा आफ्नो स्थिति थप मजबुत बनाउने अवसर प्राप्त गर्नेछ।
कप्तान रोहित पौडेलको नेतृत्वमा रहेको नेपाली टोली आज अघिल्ला तीन खेलका कमजोरी सुधार गर्दै पुनरागमन गर्ने लक्ष्यमा मैदान उत्रनेछ।
विशेषगरी शीर्षक्रमको जिम्मेवार ब्याटिङ, मध्यक्रमको स्थिरता, डेथ ओभरको प्रभावकारी बलिङ र चुस्त फिल्डिङ नै नेपालको जितको आधार बन्न सक्छ।
लगातार तीन हारपछि दबाबमा रहेको नेपालले आज नेदरल्यान्ड्सविरुद्ध कस्तो प्रदर्शन गर्छ भन्नेमा नेपाली क्रिकेट समर्थकको विशेष चासो रहेको छ।
आजको नतिजाले यस सिरिजको मात्र होइन, आगामी विश्वकप छनोट यात्राको आत्मविश्वासमा समेत ठूलो प्रभाव पार्ने अपेक्षा गरिएको छ।
