इस्लामाबाद । उत्तरी पाकिस्तानमा पर्यटक बोकेको बस दुर्घटना हुँदा १० जनाको मृत्यु भएको छ भने १३ जना घाइते भएका छन् ।
प्रहरीका अनुसार इस्लामाबाद–मुर्री एक्सप्रेसवे अन्तर्गत खाजोट क्षेत्र नजिक बसले मोडमा नियन्त्रण गुमाउँदा दुर्घटना भएको हो। सडकबाट तल खस्नुअघि बसमा आगलागीसमेत भएको प्रहरीले जनाएको छ।
दुर्घटनामा परेका सबै यात्रु एउटै परिवारका सदस्य रहेको बताइएको छ। उनीहरू मुल्तानबाट पर्यटकीय गन्तव्य मुर्रीतर्फ जाँदै थिए। यात्रुमध्ये अधिकांश बालबालिका रहेका पाकिस्तानी सञ्चारमाध्यमहरूले जनाएका छन्।
घाइतेहरूको उद्धार गरी नजिकका अस्पतालमा उपचारका लागि पठाइएको छ। केही घाइतेको अवस्था गम्भीर रहेकाले मृतकको संख्या बढ्न सक्ने आशंका गरिएको छ।
पाकिस्तानी अधिकारीहरूले दुर्घटनाको कारण पत्ता लगाउन अनुसन्धान सुरु गरेका छन्। प्रारम्भिक रूपमा तीव्र गति, सडकको अवस्था वा प्राविधिक खराबीमध्ये कुनै कारण हुन सक्ने अनुमान गरिए पनि घटनाको यथार्थ कारण खुल्न बाँकी रहेको जनाइएको छ।
