काठमाडौँ। क्यानले बुधबार एक कार्यक्रम आयोजना गर्दै रुवान्डामा हुने आईसीसी वुमेन्स च्यालेन्ज ट्रफीमा सहभागी हुन जाने नेपाली टोलीलाई बिदाइ गरेको हो ।
बिदाइ कार्यक्रममा कप्तान इन्दु बर्माले यसपटक लामो समयको प्रशिक्षण क्याम्प र विदेशी प्रशिक्षकको नेतृत्वमा टोलीको प्रदर्शनमा उल्लेखनीय सुधार आएको बताएकी छन् । उनले आगामी दिनमा अझ उत्कृष्ट प्रदर्शन गर्ने लक्ष्य रहेको पनि बताइन् ।
उनले भनिन्, ‘जति पनि हामी क्रिकेट खेल्दै आयौँ, अब २०८३ सालमा अझ राम्रो खेलेर जित हासिल गर्ने छौँ । लामो समयको प्रशिक्षण क्याम्प र विदेशी कोचको अन्डरमा धेरै कुरा सुधार भइरहेको छ । रणनीतिअनुसार धेरै सुधार भएको छ, क्यानले पनि महिला क्रिकेटलाई धेरै सपोर्ट गरेको छ । यसपटक उपाधि जितेर नै फर्कने लक्ष्य लिएका छौँ।’
मुख्य प्रशिक्षक हर्षल पाठकले यसपटकको क्याम्प प्रभावकारी भएको र दबाबमा राम्रो प्रदर्शन गर्नु सबैभन्दा महत्वपूर्ण पक्ष रहने बताएका छन् ।
अप्रिल १८ देखि मे १ सम्म हुने प्रतियोगितामा नेपालसँगै इटाली, रुवान्डा, अमेरिका र भानुआतुले प्रतिस्पर्धा गर्ने छन् ।
नेपालको टोलीमा इन्दु बर्मा (कप्तान), पूजा महतो, बिन्दु रावल, रुबिना क्षेत्री, रुबी पोदार, रोमा थापा, कविता जोशी, कविता कुँवर, सम्झना खड्का, अनु कडायत, सुमन विष्ट, रिया शर्मा, रचना चौधरी र मनिषा उपाध्याय छन् ।
