पाेखरा। भारतका प्रधानमन्त्री नरेन्द्र मोदीले भारी वर्षाका कारण नेपालमा भएको जनधनको क्षतिप्रति दुःख व्यक्त गर्दै यस कठिन समयमा नेपाल सरकार र नेपाली जनतासँग ऐक्यभाव प्रकट गरेका छन् । साथै उनले भारत सँधै नेपाललाई सहयोगका लागि तयार रहेको स्पष्ट पारे ।
प्रधानमन्त्री मोदीले आइतबार सामाजिक सञ्जाल ‘एक्स’ (पूर्व ट्वीटर) मार्फत एक सन्देश दिँदै लेखेका छन्, ‘नेपालमा भारी वर्षाका कारण भएको जनधनको क्षति अत्यन्तै दुःखद् छ । यस कठिन घडीमा हामी नेपाल सरकार र नेपाली जनताको साथमा छौँ । मित्र राष्ट्र र पहिलो प्रत्युत्तरदाताको हैसियतले भारत आवश्यक सबै प्रकारको सहयोग गर्न प्रतिबद्ध छ ।’
नेपालका विभिन्न भागमा जारी भारी वर्षाले बाढी, पहिरो र डुबानजस्ता प्राकृतिक विपद् निम्त्याउँदै मानवीय तथा भौतिक क्षति पुर्याएको छ । उद्धार र राहतकार्य जारी रहेको अवस्थामा भारतले पुनः एक पटक छिमेकीको हैसियतले सहयोगको प्रस्ताव अघि सारेको हो । भारतले नेपालमा विभिन्न विपद्को बेला उद्धार, राहत तथा पुनर्निर्माणमा सक्रिय भूमिका खेल्दै आएको छ ।
