काठमाडौँ । राष्ट्रिय प्रजातन्त्र पार्टी (राप्रपा) का केन्द्रीय सदस्य एवं युवा नेतृ खुश्बू ओलीले अहिलेको अन्तरिम सरकार तातो गोली खाएर ढलेका नवयुवकका बलिदानीलाई अपमान गर्न उद्धत रहेको आरोप लगाएकी छन् ।
राप्रपा निकट युवाहरूले काठमाडौँको माइतीघरमा शनिबार गरेको सरकारविरुद्ध प्रदर्शनका क्रममा ओलीले यस्तो आरोप लगाएकी हुन् ।
जेनजी पुस्ताको माग अनुसार अन्तरिम सरकारले काम नगरेको उनले बताइन् ।
ओलीले अन्तरिम सरकारले जेनजी पुस्ताको क्रान्ति र बलिदानीको भावनालाई लत्ताएर सरकार परिवर्तनमात्र उपलव्धिको रुपमा लिएर अघि बढ्न खोजेको समेत आरोप लगाइन् ।
क्रान्तिपछि बनेको सरकारले संविधान संशोधनको पहल नगर्नु, जेनजी विद्रोहलाई बर्बर दमन गर्नु, तत्कालीन राज्य सञ्चालकलाई कारवाहीको प्रक्रिया शुरू नगर्नुले सशंकितमात्र बनाएको उनको भनाइ छ ।
उनले क्रान्तिको बलमा संसद् विघटन गरेर संसदभन्दा बाहिरबाट बनेको सरकारले क्रान्ति र सहादतमाथि बेइमानी गरेको बताइन् ।
क्रान्तिको भावना विपरीत जाने छुट आजको अन्तरिम सरकारलाई नभएको भन्दै उनले असफल राजनीतिक दलका नेताहरू पुनः राजनीतिक क्रियाकलापमा फर्किनु उचित नभएको समेत बताइन् ।
शहीदका रगत सुक्न नपाउँदै र खरानी भएका संरचनामाथि टेकेर पुनः यिनै असफल राजनीतिक दलका नेताहरूले मुन्टो उठाउने ढृष्टता गर्नुले ऐतिहासिक बलिदानीमाथि उपहास गरेको उनको भनाइ छ ।
