आज खण्डग्रास चन्द्रग्रहण लाग्दै, कुम्भ राशिलाई अति कष्ट [भिडियाेसहित]

पोखरा । वि.सं. २०८२ को पहिलो खण्डग्रास चन्द्रग्रहण आइतबार लाग्दैछ । २०८२ सालकै फागुन १९ गते मंगलबार पनि चन्द्रग्रहण नै लाग्दैछ । एकै वर्ष दुई वटा चन्द्रग्रहण लाग्ने भएकाले निकै महत्वका साथ हेरिएको छ ।

आज आइतबार लाग्ने पहिलो चन्द्रग्रहण तीन घण्टा ३० मिनेट लामो हुनेछ । राति १० बजेर ११ मिनेटमा शुरू हुने चन्द्रग्रहण राति ११ बजेर १५ मिनेटमा सम्मीलन, राति ११ बजेर ५६ मिनेटमा मध्य, राति १२ बजेर ३८ मिनेटमा उन्मीलन, राति १ बजेर ४१ मिनेटमा मोक्ष अर्थात समाप्त हुनेछ ।

यो ग्रहण नेपालसहित दक्षिण र पूर्वी एशियाका देश तथा अष्ट्रेलिया, अफ्रिका र सम्पूर्ण युरोपबाट देख्न सकिने दावी गरिएको छ ।

राति १० बजेर ११ मिनेटमा सुरू हुने भए पनि सो दिन दिउँसो ११ बजेर ११ मिनेटदेखि नै कुनै पनि भोजन गर्न हुँदैन भन्ने मान्यता छ । तर, बालबालिका, जेष्ठ नागरिक, अशक्त र बिरामीलाई भने भोजन बर्जित नहुने धर्म एवं ज्योतिष शास्त्रमा उल्लेख छ ।

ग्रहणको समयमा वातावरणमा नकारात्मक उर्जा प्रवाह हुने र त्यसले स्वास्थ्यमा असर पर्न सक्ने भएकाले यस्तो बेला खाने कुरा खान हुँदैन भनिएको हो ।

भदौ २२ गते राति चन्द्रग्रहण लागेको बेलामा शतभिषा र पूर्वाभाद्रपदा नक्षत्र कुम्भ राशि भएका व्यक्तिलाई कष्ट हुनेछ । अरुहरुलाई भने सामान्य लाभ र हानी हुनेछ । त्यसैले यो बेलामा गंगा स्नान, जप, हवन, पाठ पारायण, दान-धर्म गरेमा अन्य बेलामा गरेको भन्दा अधिक फल प्राप्त हुनेछ ।

ग्रहण लागेको बेलामा के-के गर्नु हुँदैन ?

ग्रहण लागेका बेलामा सुतेमा रोग लाग्छ, दिसा-पिसाव गरेमा दरिद्र हुन्छ, त्यसपछि दिसा-पिसावको किरोको योनीमा जन्म हुन्छ, मैथुन गरेमा गाउँको सुँगुर भएर जन्मन्छ भन्ने मान्यता छ । यस्तै शृङ्गार वा गाजल लगाएमा कुष्टरोगी हुन्छ, भोजन गरेमा अधोगति अर्थात पतनै हुन्छ, बन्धनमा बसेमा सर्पको योनी हुन्छ र कसैलाई वा आफू मरेमा नरकमा जानेछ ।

विज्ञानले पनि यो ग्रहण लागेको बेलामा ब्याक्टोरीयाको किटाणु घुम्ने हुँदा नखानू भनेको छ । त्यसैले ग्रहण लागेको बेलामा शरीरमा ब्याक्टोरिया बस्ने हुँदा ग्रहण सकिएपछि स्नान गर्नुपर्छ भन्दै आएको छ ।

चन्द्रग्रहण वा सूर्यग्रहणमा पूजापाठ गरी दान गरेमा शुभ फल प्राप्त हुने विश्वास छ । तर, चन्द्रग्रहण लागेको बेला मांगलिक कार्य गर्नु हुँदैन । चन्द्रग्रहणमा गरेको मांगलिक कार्यबाट फल प्राप्त नहुने धार्मिक विश्वास छ ।

ग्रहणको पूजा गर्नुअघि घरलाई शुद्ध पार्ने प्रचलन छ । साथै चक्कु, कैंची, सियो धागोको काम गर्न नहुने बताइन्छ । ग्रहणको बेला घरभित्रै बसेको राम्रो मानिन्छ । किनकी ग्रहणको बेला हानिकारक प्रकाशले असर गर्ने मान्यता छ ।

यसैगरी फूल टिप्न, कपाल काट्न, नुहाउन, कपडा धुन, ब्रस गर्न, दूध दुहुन र सुत्न नहुने मान्यता छ । ग्रहण सकिएलगत्तै ग्रहणको पूजा गर्दै दान दिएमा सुख, शान्ति र समृद्धि मिल्ने विश्वास छ ।

यस्तै राशि अनुसार ग्रहणको प्रभाव पनि फरकफरक हुन्छ । कुम्भ राशिको शतभिषा र पूर्वभाद्रपदा नक्षत्रमा चन्द्रग्रहण पर्छ । त्यसैले कुम्भ राशिका व्यक्तिले यस पटकको चन्द्रग्रहण हेर्न हुँदैन ।

यस्तै मेष, वृष, कन्या र धनु राशि भएकालाई शुभ रहेको भने ग्रहण अवलोकन गर्नु राम्रो मानिन्छ । मिथुन, कर्कट, सिंह, तुला, वृश्चिक, मकर, कुम्भ र मीन राशिका लागि ग्रहणको फल राम्रो हुँदैन ।

यस पटकको चन्द्र ग्रहणको फल कुन राशिलाई कस्तो ?

मेषः लाभ
वृषः सुखम्
मिथुनः माननाश
कर्कटः कष्टम्
सिंहः स्त्रीपीडा
कन्याः सौख्यम्
तुलाः चिन्ता
वृश्चिकः व्यथा
धनुः श्रीप्राप्ति
मकरः क्षति
कुम्भः घात
मीनः व्यय

भिडियाे