काठमाडौँ । नेकपा एमालेका अध्यक्ष केपी शर्मा ओलीले आगामी निर्वाचनमा पनि आफ्नो पार्टीविरुद्ध मोर्चाबन्दी हुन सक्ने भन्दै एकजुट भएर प्रतिवाद गर्न नेता तथा कार्यकर्तालाई आह्वान गरेका छन्।
पार्टी कार्यालय च्यासलमा केन्द्रीय सदस्यहरूको शपथग्रहण कार्यक्रममा बोल्दै ओलीले २०७७ सालदेखि नै एमालेविरुद्ध घेराबन्दी हुँदै आएको दाबी गरे।
२०७८ सालमा पार्टी विभाजन गराइएको र २०७९ सालको निर्वाचनमा विभिन्न दलले एमालेविरुद्ध मोर्चाबन्दी गरेको उनको आरोप थियो।
उनले सामाजिक सञ्जालमार्फत पार्टी र नेताहरूको चरित्रहत्या गरी जनतामाझ अलोकप्रिय बनाउने प्रयास भइरहेको आरोप लगाए। पार्टीभित्रका केही नेताका गतिविधिले पनि चुनौती थपिएको उनको भनाइ थियो।
ओलीले नेपालमा लोकतन्त्र, राष्ट्रिय अस्मिता, स्वाधीनता र स्वतन्त्रता कमजोर पार्ने काम भइरहेको आरोप लगाउँदै तिनको पुनःस्थापनाका लागि आन्दोलन गर्नुपर्ने अवस्था आउन सक्ने बताए। उनले आगजनी र लुटपाटलाई आन्दोलन मान्न नसकिने स्पष्ट पारे
शान्तिपूर्ण आन्दोलनमा दमन भए प्रतिवाद गर्नुपर्ने उनको भनाइ थियो। ओलीले पार्टी सदस्यलाई निष्ठापूर्वक सक्रिय हुन निर्देशन दिँदै अब विगतको भूमिकाका आधारमा मात्रै मूल्याङ्कन नगर्ने बताए। नीति र नेतृत्वप्रतिको इमानदारिता तथा कर्मशीलतालाई पनि मूल्याङ्कनको आधार बनाइने उनले उल्लेख गरे।
