काठमाडौँ। नेपाली कांग्रेसको १५औँ महाधिवेशनअन्तर्गत नयाँ केन्द्रीय नेतृत्व चयनका लागि आज मतदान हुँदैछ। बिहान १० बजेदेखि साँझ ६ बजेसम्म हुने मतदानमा ७ हजार २५५ महाधिवेशन प्रतिनिधिले नयाँ नेतृत्व चयनका लागि मताधिकार प्रयोग गर्नेछन्।
यसपटक सभापति पदको प्रतिस्पर्धा गगनकुमार थापा र श्यामकृष्ण खड्गीबीच सीमित भएको छ। प्रारम्भिक नामावलीमा किशोरसिंह राठोरसमेत तीन उम्मेदवार रहे पनि उनले उम्मेदवारी फिर्ता लिएपछि अन्तिम सूचीमा दुई जना मात्र छन्। यसले महाधिवेशनको नेतृत्व प्रतिस्पर्धालाई दुई धारबीचको प्रत्यक्ष चुनावमा केन्द्रित गरेको छ।
सभापतिबाहेक केही पदमा भने प्रतिस्पर्धा छैन। वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसाल निर्विरोध निर्वाचित भइसकेका छन्।
खुला उपसभापतिका दुई पदका लागि गोविन्द भट्टराई, डा. चन्द्रकान्त भण्डारी, प्रा. डा. चन्द्रमोहन यादव, दीपक गिरी, धनराज गुरुङ, मधु आचार्य र सुरेन्द्रराज पाण्डे प्रतिस्पर्धामा छन्। समावेशी उपसभापतिमा जीवन परियार, फरमुल्लाह मंसुर, विनोदकुमार चौधरी, रञ्जित कर्ण र सीता गुरुङ उम्मेदवार छन्।
महामन्त्रीमा पनि बहुपक्षीय प्रतिस्पर्धा छ। खुलातर्फ अमरसिंह पुन मगर, उदयशमशेर राणा, गुरुराज घिमिरे, नैनसिंह महर, प्रदीप पौडेल, शंकर तिवारी, डा. सन्तोष उपाध्याय र डा. सुनिलकुमार शर्मा उम्मेदवार छन्। महिलातर्फ डा. डिला संग्रौला पन्त, महालक्ष्मी उपाध्याय ‘डिना’ र रीता खनालबीच प्रतिस्पर्धा हुँदैछ।
सहमहामन्त्रीतर्फ महिला पदमा नानुमैया बास्तोला र प्रतिमा गौतम तथा खुलातर्फ अजयबाबु शिवाकोटी, अमृतकुमार अर्याल, देवेन्द्रराज कँडेल, डिल्लीराम सुवेदी, विकास कोइराला, विमलराज क्षेत्री, रमेशप्रसाद धमला, रामहरि खतिवडा र राजीव ढुंगाना प्रतिस्पर्धामा छन्। अन्य समावेशी समूहका सहमहामन्त्री तथा केन्द्रीय सदस्य पदमा पनि उम्मेदवारबीच प्रतिस्पर्धा छ। कांग्रेसको अन्तिम नामावलीमा ५८ पदका लागि ८११ उम्मेदवार कायम छन्।
मतदानका लागि प्रतिनिधिको प्रदेश तथा समूहअनुसार छुट्टाछुट्टै केन्द्रको व्यवस्था गरिएको छ। बागमतीका प्रतिनिधिले राष्ट्रिय सभागृहमा मतदान गर्नेछन् भने खुलामञ्च परिसरमा कोशी, मधेस, लुम्बिनी, कर्णाली, सुदूरपश्चिम, जनसम्पर्क समिति तथा भ्रातृ संस्थासम्बन्धी समूहका लागि छुट्टाछुट्टै व्यवस्था गरिएको छ। गण्डकीका प्रतिनिधिका लागि हिमाल हल र मधेस प्रदेशका लागि तराई-मधेस हल तोकिएको छ।
यसअघि बिहान ७ बजेबाट मतदान गर्ने कार्यतालिका रहे पनि वर्षा र प्राविधिक कारणले तीन घण्टा पछि सारिएको हो। मतदानअघि प्रतिनिधिको परिचयपत्र र मतदाता नामावली रुजु गरिनेछ। मतदान सकिएपछि मतगणना सुरु हुने निर्वाचन समितिले जनाएको छ।
यसपटकको महाधिवेशनमा नेतृत्व चयनसँगै कांग्रेसको आगामी संगठनात्मक दिशा पनि तय हुँदैछ। सभापतिमा दुई उम्मेदवारबीचको प्रत्यक्ष प्रतिस्पर्धासँगै पदाधिकारीका विभिन्न तहमा देखिएको बहुपक्षीय चुनावले पार्टीभित्र नेतृत्व, पुस्तान्तरण, संगठन सञ्चालन र आगामी राजनीतिक प्राथमिकताबारे प्रतिनिधिहरूको निर्णयलाई महत्व दिएको छ।
