काठमाडौँ । बाढी, पहिरो र भू-क्षयजस्ता प्राकृतिक प्रकोप न्यूनीकरण गर्दै पारिस्थितिक सन्तुलन कायम राख्ने तथा जमिनको उर्वराशक्ति संरक्षण गर्ने उद्देश्यले आज राष्ट्रिय भू-संरक्षण दिवस विभिन्न कार्यक्रम आयोजना गरी मनाइँदैछ।
प्राकृतिक प्रकोपबाट हुने क्षति न्यूनीकरण, माटोको कटान नियन्त्रण तथा भौतिक पूर्वाधारको संरक्षणमा जनचेतना अभिवृद्धि गर्ने उद्देश्यले यो दिवस मनाउने गरिन्छ।
भू-संरक्षणका माध्यमबाट वातावरणीय सन्तुलन कायम राख्नुका साथै कृषि उत्पादन र प्राकृतिक स्रोतको दीगो व्यवस्थापनमा समेत योगदान पुग्ने विश्वास गरिएको छ।
इतिहास हेर्दा भू तथा जलाधार संरक्षण विभाग स्थापना भएको दिन साउन २४ गतेलाई स्मरण गर्दै विसं २०३१ देखि राष्ट्रिय भू-संरक्षण दिवस मनाउँदै आएको पाइन्छ।
दिवसका अवसरमा भू-संरक्षणको महत्वबारे जनचेतना अभिवृद्धि गर्न वृक्षरोपण, अन्तरक्रिया, सचेतनामूलक कार्यक्रमलगायत विभिन्न कार्यक्रम आयोजना गरिँदै आएका छन्।
