काठमाडौँ। नेपाली बजारमा साताको पहिलो दिन आइतबार सुनचाँदीको भाउ घटेको छ। गत शुक्रबारको तुलनामा आइतबार सुनको भाउ तोलामा चार सय र चाँदीको १० रुपैयाँ घटेको हो ।
मूल्य घटेसँगै आइतबार छापावाला सुनको भाउ प्रतितोला दुई लाख ९० हजार तीन सय रुपैयाँ कायम भएको नेपाल सुनचाँदी रत्न तथा आभूषण महासंघले जनाएको छ ।
यसअघि गत शुक्रबार सुनको मूल्य प्रतितोला दुई लाख ९० हजार सात सय रुपैयाँ रहेको थियो ।
यता, गत शुक्रबार प्रतितोला चार हजार छ सय १५ रुपैयाँ रहेको असली चाँदीको भाउ आइतबार घटेर चार हजार छ सय पाँच रुपैयाँ कायम भएको छ। सुनचाँदीको मूल्य हालसम्मकै उच्च गत माघ १५ गते भएको थियो ।
उक्त दिनमा सुन प्रतितोला तीन लाख ३९ हजार तीन सय र चाँदी सात हजार पाँच सय पाँच रुपैयाँमा कारोबार भएको थियो।
अन्तर्राष्ट्रिय बजारमा आएको उतारचढावका कारण स्थानीय बजारमा पनि सुनको मूल्य प्रभावित भएको बजार विश्लेषकहरूको दाबी छ ।
अन्तर्राष्ट्रिय बजारमा हुने उतारचढावका आधारमा नेपालमा महासंघले दैनिक रूपमा सुन तथा चाँदीको कारोबार मूल्य तोक्दै आएको छ।
