पोखरा । फेवातालमा पौडी खेल्ने क्रममा डुबेर एक १० वर्षीय बालकको मृत्यु भएको छ।
जिल्ला प्रहरी कार्यालय कास्कीका अनुसार पोखरा महानगरपालिका-१८ का १० वर्षीय अरेश लामा शुक्रबार बिहान फेवातालको खपौदी क्षेत्रमा पौडी खेल्ने क्रममा डुबेर बेपत्ता भएका थिए।
बिहान करिब ११:०५ बजे भएको घटनामा बालक अचानक पानीमा डुबेर बेपत्ता भएको प्रहरीले जनाएको छ।
घटनापछि स्थानीयले तत्काल उद्धार प्रयास गरेका थिए भने सूचना पाएलगत्तै सुरक्षा निकाय परिचालन गरिएको थियो।
उद्धारका लागि वडा प्रहरी कार्यालय बैदामबाट प्रहरी निरीक्षक मुकुन्द सिग्देलको कमाण्डमा आठ जनाको टोली खटिएको थियो।
त्यसैगरी, सशस्त्र प्रहरी बल नेपाल नं. २४ गणबाट सशस्त्र प्रहरी नायव निरीक्षक तारा चन्द्र शर्माको कमाण्डमा सात जनाको टोली परिचालन गरिएको प्रहरीले जनाएको छ।
सशस्त्र प्रहरीको उद्धार टोलीले बालकलाई पानीबाट निकालेर तत्काल उद्धार गरेको भए पनि अवस्था गम्भीर थियो।
उद्धारपछि उनलाई उपचारका लागि पश्चिमाञ्चल क्षेत्रीय अस्पताल लगिएको थियो।
अस्पताल पुर्याइएपछि चिकित्सकले उनलाई उपचारका क्रममा करिब १२:१५ बजे मृत घोषणा गरेका थिए।
घटनापछि परिवारमा शोक छाएको छ भने स्थानीय क्षेत्रमा पनि दुःख व्यक्त गरिएको छ।
फेवाताल क्षेत्र पोखराको प्रमुख पर्यटकीय गन्तव्य भए पनि पछिल्लो समय यहाँ पौडी तथा असुरक्षित जल गतिविधिका कारण दुर्घटना हुने जोखिम बढ्दै गएको देखिन्छ।
सुरक्षा निकायले ताल क्षेत्रमा पौडी खेल्दा विशेष सावधानी अपनाउन आग्रह गर्दै आएका छन्। प्रहरीले घटनाबारे थप अनुसन्धान भइरहेको जनाएको छ।
