काठमाडौँ । नेपाल आयल निगमले पेट्रोल, डिजेल र मट्टितेलमा प्रतिलिटर १५ रुपैयाँ मूल्यवृद्धि गरेको छ।
मूल्यवृद्धि चैत २० गते मध्यरातदेखि लागू भएको आयल निगमले जानकारी दिएको छ। निगमले यो कदम हालको बजार मूल्य र अन्तर्राष्ट्रिय तेल मूल्य वृद्धिलाई ध्यानमा राखेर चालिएको जनाएको छ।
नयाँ मूल्य अनुसार राजधानी काठमाडौँ, पोखरा र दिपायल जस्ता तेस्रो वर्गका शहरहरूमा पेट्रोलको मूल्य प्रतिलिटर २०२ रुपैयाँ पुगेको छ।
यसअघि यहाँको मूल्य १८७ रुपैयाँ रहेको थियो। डिजेल र मट्टितेलको मूल्य पनि १६७ रुपैयाँबाट बढेर १८२ रुपैयाँ प्रतिलिटर पुगेको छ।
पहिलो वर्गमा पर्ने चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पेट्रोलको मूल्य १८४ रुपैयाँबाट बढेर १९९ रुपैयाँ ५० पैसा पुगेको छ। त्यहाँको डिजेल/मट्टितेलको मूल्य १६४ रुपैयाँ ५० पैसा बाट बढेर १७९ रुपैयाँ ५० पैसा पुगेको छ।
दोस्रो वर्गका सुर्खेत र दाङमा पेट्रोलको मूल्य १८६ रुपैयाँबाट बढेर २०१ रुपैयाँ प्रतिलिटर पुगेको छ। डिजेल/मट्टितेलको मूल्य १६६ रुपैयाँबाट बढेर १८१ रुपैयाँ प्रतिलिटर पुगेको छ।
नयाँ मूल्य समायोजनका बाबजुद १५ दिनमा निगमलाई करिब ११ अर्ब ७१ करोड रुपैयाँ घाटा हुने निगमको अनुमान छ।
