पोखरा। दीपेन्द्र सिंह ऐरी को आक्रामक अर्धशतकमा नेपालले आईसीसी टी-२० विश्वकप २०२६ अन्तर्गत आफ्नो चौथो खेलमा स्कटल्याण्डलाई ७ विकेटले पराजित गरेको छ। यससँगै नेपालले १२ वर्षपछि टी-२० विश्वकपमा पहिलो जित दर्ता गरेको हो।
वानखेडे स्टेडियम मा भएको खेलमा स्कटल्याण्डले दिएको १७१ रनको लक्ष्य नेपालले १९.२ ओभरमा ३ विकेट गुमाएर पूरा गर्यो। दीपेन्द्रले २३ बलमा ४ चौका र ३ छक्का प्रहार गर्दै अर्धशतक बनाए। कुशल भुर्तेलले ४३ र आसिफ शेखले ३३ रन योगदान दिए।
ओपनर कुशल र आसिफले पहिलो विकेटका लागि ७४ रनको साझेदारी गर्दै नेपाललाई बलियो शुरूआत दिलाएका थिए।
९८-३ को अवस्थाबाट दीपेन्द्र र गुल्सन झाले जिम्मेवारी सम्हाल्दै जित सुनिश्चित गरे। स्कटल्याण्डका माइकल लिस्कले ३ विकेट लिए पनि टोलीलाई जिताउन सकेनन्।
यसअघि टस जितेर बलिङ रोजेको नेपालविरुद्ध स्कटल्याण्डले ७ विकेट गुमाएर १७० रन बनाएको थियो। माइकल जोन्सले सर्वाधिक ७१ रन बनाए। नेपालका सोमपाल कामीले ३ तथा नन्दन यादवले २ विकेट लिए।
डेथ ओभरमा नेपाली बलरहरूले उत्कृष्ट प्रदर्शन गर्दै अन्तिम पाँच ओभरमा ६ विकेट लिएर मात्र ३९ रन खर्चिए। सोमपाल टी-२० विश्वकपमा नेपालका लागि सर्वाधिक विकेट (९) लिने खेलाडीसमेत बने।
सुपर एट पुग्ने लक्ष्य राखेको नेपाल समूह चरणबाटै बाहिरिए पनि अन्तिम खेलमा जित निकाल्दै प्रतियोगिताको सुखद् अन्त्य गरेको छ।
