काठमाडौँ । हाल देशमा पश्चिमी वायुको आंशिक प्रभाव रहेकाले तराईका धेरै स्थान र विभिन्न उपत्यकाहरूमा बाक्लो हुस्सु लागेको जल तथा मौसम पूर्वानुमान महाशाखाले जनाएको छ।
महाशाखाका अनुसार देशका हिमाली तथा उच्च पहाडी भागमा आंशिक बदली भएको छ भने तराईका केही स्थानमा मध्याह्नसम्म हुस्सु लाग्ने सम्भावना छ।
पहाडी भेगमा साधारणतया बदली रहे पनि तराईको मौसम भने मुख्यतया सफा रहने अनुमान गरिएको छ।
यद्यपि, कोशी, बागमती, गण्डकी र कर्णाली प्रदेशका उच्च पहाडी तथा हिमाली भागका एक–दुई स्थानमा हल्का वर्षा र हिमपात हुन सक्ने सम्भावना देखिएको छ।
आज राति पनि तराईका केही स्थानमा तुँवालो लाग्ने र कोशी तथा गण्डकी प्रदेशका उच्च पहाडी भागमा मौसम बदली रहने महाशाखाको भनाइ छ।
तत्काल वर्षाको ठुलो सम्भावना नरहेकाले तराई र उपत्यकाहरूमा वायु प्रदूषणको स्तर कायमै रहने देखिएको छ।
बाक्लो हुस्सु र प्रदूषणका कारण जनजीवन प्रभावित हुन सक्ने भन्दै महाशाखाले प्रतिकूल मौसममा सुरक्षित रहन सर्वसाधारण र सरोकारवाला सबैलाई अनुरोध गरेको छ। हिमाली भेगमा हुने हल्का हिमपातले चिसो अझै बढ्न सक्ने भएकाले सावधानी अपनाउन पनि उसले सुझाएको छ।
