काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध विभिन्न जिल्ला अदालतमा चलिरहेका संगठित अपराध र सम्पत्ति शुद्धीकरणका अभियोग फिर्ता लिइने भएको छ ।
यसका लागि महान्यायाधिवक्ता कार्यालयले सम्बन्धित सरकारी वकीलहरूलाई स्वीकृति दिएको बताइएको छ।
यस निर्णयसँगै कास्की, रुपन्देही, काठमाडौँ र पर्सा जिल्ला अदालतमा रहेका ती अभियोगहरू फिर्ता लिन बाटो खुलेको हो ।
यद्यपि, सहकारी ठगीसम्बन्धी मुद्दा भने यथावत् रहने महान्यायाधिवक्ता कार्यालयले स्पष्ट पारेको छ।
बुधबार चार ओटा जिल्ला अदालतमा चलिरहेका अभियोगपत्र संशोधन गर्न निर्णय गरिएको हो। यसअनुसार कास्कीमा चलिरहेको संगठित अपराध र सम्पत्ति शुद्धीकरणको मुद्दा, साथै रुपन्देही, काठमाडौं र पर्सामा चलिरहेको संगठित अपराधको मुद्दा फिर्ता हुनेछ।
यसैगरी चितवन जिल्ला अदालतमा यस्ता अभियोग नचलेकाले त्यहाँ अभियोगपत्र संशोधन गर्ने निर्णय गरिएको छैन।
