काठमाडौँ । राष्ट्रिय स्वतन्त्र पार्टी (रास्वपा) दुई उपसमिति गठन गरेको छ ।
आइतबार बसेको केन्द्रीय समितिको बैठकले पार्टी समायोजन तथा निर्वाचन केन्द्रित दुई ओटा उपसमिति गठन गर्ने निर्णय गरेको प्रवक्ता मनिष झाले जानकारी दिएका छन् ।
बैठकले प्रतिनिधिसभा सदस्य निर्वाचन २०८२मा योग्य उम्मेद्वार छनोटको प्रत्याभूतिका लागि पार्टी उपसभापति डा स्वर्णिम वाग्लेको संयोजकत्वमा उम्मेद्वार सिफारिस उपसमिति गठन गर्ने निर्णय गरेको छ ।
यस उपसमितिलाई योग्य उम्मेद्वार एवं छनोट प्रक्रिया समेतको सिफारिस गर्ने जिम्मेवारी दिने र उपसमितिको सदस्यहरू पार्टी सचिवालयले मनोनयन गर्ने प्रवक्ता झाले जानकारी दिए ।
त्यस्तै पार्टी एकता र पार्टी समायोजनलाई सहजीकरण र निस्कर्षमा पुर्याउन पार्टी महामन्त्री कविन्द्र बुर्लाकोटीको संयोजकत्वमा पार्टी एकता समायोजन उपसमिति गठन गर्ने निर्णय गरिएको छ ।
यस उपसमितिको सदस्यहरू पनि पार्टी सचिवालयले मनोनयन गर्ने प्रवक्ता झाले जानकारी दिए ।
