काठमाडौँ । प्रधानमन्त्री सुशीला कार्कीले भदौ २३ र २४ को दुःखद् घटनापछि देश फेरि शान्तिको बाटोमा फर्किएको दावी गरेकी छन् । आफ्नो नेतृत्वमा अन्तरिम सरकार गठन भएको १०० दिन पूरा भएको सन्दर्भमा सम्बोधन गर्दै उनले यस्तो दावी गरेकी हुन् ।
उनले जेनजी आन्दोलनका घटनामा ज्यान गुमाउनेलाई शहीद घोषणा गरिएको र घाइतेको उपचारका साथै जीवितका सुनिश्चित गर्ने प्रक्रिया अघि बढाएको बताइन् ।
क्षतिग्रस्त संरचनाहरूको पुनर्निर्माणका लागि भौतिक पूर्वाधार पुनर्निर्माण कोषमार्फत काम थालिएको भन्दै प्रधानमन्त्रीले अब ती नमीठा पलहरूलाई बिर्सेर एउटा सुन्दर र स्थिर भविष्य निर्माणतर्फ हातमा हात मिलाएर अघि बढ्नुपर्नेमा जोड दिइन् ।
संवोधनका क्रममा प्रधानमन्त्रीले निर्वाचनका लागि सरकारले आफ्नो तर्फबाट सम्पूर्ण तयारी पूरा गरेको स्पष्ट पारिन् । सुरक्षाका सवालमा हामीले कुनै कसर बाँकी नराख्ने भन्दै उनले एकीकृत निर्वाचन सुरक्षा योजना स्वीकृत भइसकेको छ र नेपाली सेनाको परिचालन सुनिश्चित गरिएको जानकारी दिइन् ।
आन्दोलनका क्रममा लुटिएका एक हजार तीन सय ४२ थानमध्ये अधिकांश हतियार बरामद गरिसकिएको छ। यस अतिरिक्त अन्य ३२ थान हतियार पनि प्रहरीले नियन्त्रणमा लिएको छ। उनले क्षतिग्रस्त भएका चार सय ६५ ओटा प्रहरी कार्यालयहरूलाई पुनःसंचालनमा ल्याई सुरक्षा व्यवस्थालाई अभेद्य बनाइएको बताइन् । निर्वाचन आयोगलाई आवश्यक छ अर्ब ७३ करोड रुपैयाँ बजेट सुनिश्चित गरिएको उनको भनाइ छ।
साथै प्रधानमन्त्रीले आज भन्दा १०० दिन अघि देशको अवस्था के थियो र अहिले के छ भनेर तुलना गरी हेर्न सबै राजनीतिक पक्षहरूलाई अनुरोध गरेकी छन् ।
असामान्य परिस्थितिलाई सामान्य अवस्थामा फर्काउन आफ्नो मन्त्रिपरिषदका सदस्य, सुरक्षा निकाय राष्ट्र सेवक र नागरिक समाजका सदस्यहरूले अथक प्रयास गरेको भन्दै प्रधानमन्त्रीले यसले मुलुकमा शान्ति स्थापना गरी स्थितिको सामान्यीकरण र कानूनको शासन बहालीमा सफलता मिलेको दावी गरिन् । खासगरी सुरक्षा निकायको मनोबल अहिले र आजका लागिमात्र होइन दीर्घकालसम्म बढाउने काम गरिरहेको उनले जिकिर गरिन् ।
जेनजी आन्दोलनको भावना अनुसार नै सरकारले सुशासन र निर्वाचनलाई नै अर्जुनदृष्टि बनाएको भन्दै प्रधानमन्त्रीले सम्पूर्ण नेपाली दाजुभाई दिदीबहिनीहरूमा राष्ट्रिय एकताका लागि आह्वान गरेकी छन् ।
चुनावमा कसले जित्छ वा कसले हार्छ त्यो गौण कुरा भएको भन्दै प्रधानमन्त्रीले हाम्रो लोकतन्त्र र राष्ट्रियताले जित्नु नै सबैभन्दा ठूलो कुरा भएको स्पष्ट पारिन् । अराजकताले कसैलाई खुशी नदिने भन्दै उनले शान्ति र स्थिरताले नै समृद्धिको ढोका खोल्ने बताइन् ।
उनले भनिन्, ‘हामीले खोजेको परिवर्तन एकै दिनमा प्राप्त हुने उपलब्धि होइन। यो त एउटा लामो र अभिराम यात्रा हो। यस ऐतिहासिक परिवर्तनलाई संस्थागत गर्न हामी सबैबाट अथक पसिना र समयको माग गर्ने धैर्यको खाँचो छ। आउनुहोस् हामी फागुन २१ गतेको निर्वाचनलाई परिवर्तनको ढोका उघार्ने एक राष्ट्रिय अनुष्ठानका रुपमा सम्पन्न गरौँ। राष्ट्रिय एकताको सूत्रमा बाँधिएर देशलाई नयाँ दिशातिर लैजाऔं। यो निर्वाचनले नेपालको राजनीतिमा एउटा नयाँ स्वच्छ र सुनौलो अध्यायको शुरूआत गर्नेछ।’
यस्तो छ प्रधानमन्त्री कार्कीको संवोधनको पूर्णपाठ
आज म हाम्रा स्वाभिमानी र गौरवशाली नागरिकहरूका सामु एउटा विशेष र दृढ संकल्पका साथ उपस्थित भएकी छु। हामी सबैलाई थाहा छ केही समय अघिको जेन्जी आन्दोलनले हाम्रा सडकहरूमा एउटा फरक कम्पन पैदा गर्यो। त्यो छटपटी र त्यो आक्रोशले हाम्रो समाजलाई केही हदसम्म विथोल्ने प्रयास गरे पनि त्यसको भित्री सन्देशलाई सरकारले गम्भीरतापूर्वक लिएको छ। एउटा जीवन्त लोकतन्त्रको सौन्दर्य नै यही हो कि यसले हरेक संकटको निकास सडकको हिंसाबाट होइन संवाद र जनताको मतबाट खोज्छ। आदरणीय देशवासीहरू भदौ २३ र २४ को त्यो दुखद घटनापछि देश फेरि शान्तिको बाटोमा फर्किएको छ। ती घटनामा ज्यान गुमाउने योद्धाहरूलाई शहीद घोषणा गरेका छौं। घाइते योद्धाहरूको उपचारका साथै जीवितका सुनिश्चित गर्ने प्रक्रिया अघि बढाएका छौं। क्षति ग्रस्त संरचनाहरूको पुनर्निर्माणका लागि भौतिक पूर्वाधार पुनर्निर्माण कोष मार्फत काम थालिएको छ। अब हामीले ती नमिठा पलहरूलाई बिर्सेर एउटा सुन्दर र स्थिर भविष्य निर्माण तर्फ हातमा हात मिलाएर अघि बढ्नुपर्छ।
अहिले कतिपयको मनमा एउटा जिज्ञासा र केही ठाउँमा भ्रम पनि छ। प्रश्न गर्नेहरूले भन्ने गर्नुभएको छ के देश साँच्चै चुनावतिर बढेको हो? तर के सरकारले शान्ति सुरक्षाको ग्यारेन्टी दिन सक्छ? आज म यही मञ्चबाट देश र दुनियाँलाई प्रष्ट पार्न चाहन्छु २०८२ फागुन २१ गते हुने प्रतिनिधि सभाको निर्वाचन अब केवल एउटा कार्यतालिका मात्र रहेन। यो हाम्रो देशलाई स्थिरता दिने र नयाँ युगको सुरुवात गर्ने एकमात्र निर्विकल्प मार्ग हो। म तपाईहरूलाई आश्वस्त पार्न चाहन्छु चुनाव सार्ने वा रोक्ने जस्ता हल्लाहरू पूर्णत निराधार र भ्रमपूर्ण छन्। यो सरकार तोकिएको समयमै निष्पक्ष र भयरहित वातावरणमा चुनाव सम्पन्न गर्न चट्टान झैँ दृढ छ।
मेरा प्यारा देशवासीहरू निर्वाचनका लागि सरकारले आफ्नो तर्फबाट सम्पूर्ण तयारी पूरा गरेको छ। सुरक्षाको सवालमा हामीले कुनै कसर बाँकी राखेका छैनौ। एकीकृत निर्वाचन सुरक्षा योजना स्वीकृत भइसकेको छ र नेपाली सेनाको परिचालन सुनिश्चित गरिएको छ। आन्दोलनका क्रममा लुटिएका १३४२ थान मध्ये अधिकांश हतियार बरामद गरिसकिएको छ। यस अतिरिक्त अन्य ३२ थान हतियार पनि प्रहरीले नियन्त्रणमा लिएको छ। क्षति ग्रस्त भएका ४६५ वटा प्रहरी कार्यालयहरूलाई पुन संचालनमा ल्याई सुरक्षा व्यवस्थालाई अभेद्य बनाइएको छ। निर्वाचन आयोगलाई आवश्यक ६ अर्ब ७३ करोड रुपैयाँ बजेट सुनिश्चित गरिएको छ।
हामीले यसपटक अर्को ऐतिहासिक फड्को मारेका छौं। मतदाता नामावली ऐनमा संशोधन गरी निर्वाचनको मिति घोषणा पछि पनि ८ लाख ३७ हजार नयाँ युवालाई मताधिकार सुनिश्चित गरेका छौं। आज १ करोड ८१ लाख भन्दा बढी नेपालीको हातमा देशको भाग्य बदल्ने साँचो छ। ११४ वटा राजनीतिक दलहरू यस प्रक्रियामा सहभागी हुनुले हाम्रो लोकतन्त्रको जरा कति बलियो छ भन्ने प्रमाणित गर्छ। विचारमा मतभेद भए पनि देशलाई निकास दिन हामी सबै एक ठाउँमा छौ। मेरा प्यारा युवा साथीहरू चुनाव कसैको हार जित होइन। यो त लोकतन्त्र र सुशासन जिताउने अभियान हो। तपाईहरूले चाहेको भ्रष्टाचार मुक्त समाज र सुशासन युक्त सरकारको चाहना पूरा गर्ने वैधानिक बाटो चुनाव नै हो। म विशेष गरी हाम्रा जेन्जी युवाहरूलाई भन्न चाहन्छु तपाईहरूको आक्रोश र सपनालाई अब मतपत्रमा व्यक्त गर्नुहोस्। सडकको आन्दोलनले प्रश्न उठाउँछ तर मतपत्रले समाधान दिन्छ। तपाईको प्रत्येक भोटको सुरक्षा राज्यले गर्छ।
आज भन्दा १०० दिन अघि देशको अवस्था के थियो र अहिले के छ भनेर तुलना गरी हेर्न पनि म सबै राजनीतिक पक्षहरूलाई विनम्र अनुरोध गर्दछु। असामान्य परिस्थितिलाई सामान्य अवस्थामा फर्काउन मेरो मन्त्रिपरिषदका सदस्य, सुरक्षा निकाय राष्ट्र सेवक र नागरिक समाजका सदस्यहरूले अथक प्रयास गर्नुभएको छ। फलस्वरुप मुलुकमा शान्ति स्थापना गरी स्थितिको सामान्यीकरण र कानुनको शासन बहालीमा सफलता मिलेको छ। खासगरी सुरक्षा निकायको मनोबल अहिले र आजका लागि मात्र होइन दीर्घकालसम्म बढाउने काम गर्दछौ। विगतमा शक्तिको आडमा दबाउन खोजिएका अपराध र भ्रष्टाचारका प्रकरणहरूमा अनुसन्धान गर्ने निकायहरूले हाल पूर्ण व्यवसायिक स्वतन्त्रताका साथ कारवाही अघि बढाएका छन्। यी कारवाहीले जतिसुकै शक्तिशाली व्यक्ति वा पदाधिकारी भए पनि कानुनले उन्मुक्ति दिदैन भन्ने मान्यता स्थापित गरेको छ। कुनै पद वा शक्तिको निकटता नहेरी प्राप्त उजुरी र गुनासाका आधारमा अनुसन्धान अघि बढाइएको छ। मिलोमतोमा ठेक्का हात पार्ने विकास आयोजनाहरूको कामै नगर्ने र राज्यको स्रोत साधन दुरुपयोग गर्नेहरूको माखेसाङ्लो तोड्न पनि सरकार लागि परेको छ।
यस १०० दिनको अवधिमा फजुल खर्च नियन्त्रण र वित्तीय सुशासनमा ठोस कदम चालिएको छ। पदमा रहँदा र अवकाश भइसकेपछि पनि कतिपयले लिइरहेको अनधिकृत र अवांछित सुविधा कटौती गरेर जनताले तिरेको कर जोगिएको छ। मापदण्ड विपरित खटिएका ५०० सुरक्षाकर्मी र सवारी साधनहरू फिर्ता गरी जनताको सेवामा परिचालन गरिएको छ। अनावश्यक ३८ वटा कार्यालयहरू खारेज र ३२३ वटा दरबन्दी कटौती गरेर राज्यको व्ययभार घटाएको छ। १ खर्ब १९ अर्ब रुपैयाँ बराबरको बजेट पुन प्राथमिकीकरण गरी विकासका ठुला आयोजनामा स्थानान्तरण गरिएको छ। थलिएका व्यवसायीहरूका लागि एकीकृत व्यवसायी पुनरुत्थान योजना कार्यान्वयनमा ल्याइएको छ। हेलो सरकार मार्फत ५० हजार भन्दा बढी गुनासाहरू सम्बोधन गरिएको छ। काठमाडौंमा दैनिक २० करोड लिटर मेलम्चीको पानी सुनिश्चित गरिएको छ र राष्ट्रिय प्रसारण लाइनमा १०१ मेगावाट विद्युत थपिएको छ।
जेन्जी आन्दोलनको भावना अनुसार यो सरकारले सुशासन र निर्वाचनलाई नै अर्जुन दृष्टि बनाएको छ। म सम्पूर्ण नेपाली दाजुभाई दिदीबहिनीहरूमा राष्ट्रिय एकताका लागि आह्वान गर्दछु। चुनावमा कसले जित्छ वा कसले हार्छ त्यो गौण कुरा हो। हाम्रो लोकतन्त्र र राष्ट्रियताले जित्नु नै सबैभन्दा ठूलो कुरा हो। अराजकताले कसैलाई खुशी दिदैन केवल शान्ति र स्थिरताले नै समृद्धिको ढोका खोल्छ। हामीले खोजेको परिवर्तन एकै दिनमा प्राप्त हुने उपलब्धि होइन। यो त एउटा लामो र अभिराम यात्रा हो। यस ऐतिहासिक परिवर्तनलाई संस्थागत गर्न हामी सबैबाट अथक पसिना र समयको माग गर्ने धैर्यको थाचो छ। आउनुहोस् हामी फागुन २१ गतेको निर्वाचनलाई परिवर्तनको ढोका उघार्ने एक राष्ट्रिय अनुष्ठानका रुपमा सम्पन्न गरौं। राष्ट्रिय एकताको सूत्रमा बाँधिएर देशलाई नयाँ दिशातिर लैजाऔं। यो निर्वाचनले नेपालको राजनीतिमा एउटा नयाँ स्वच्छ र सुनौलो अध्यायको शुरूआत गर्नेछ।
