पोखरा । पोखरा महानगरपालिकाको ६७औँ स्थापना दिवस मनाउने तयारी गरेको छ। दिवसको अवसरमा पोखरेली नवरत्नहरूलाई सम्मान गरिने भएको छ ।
भाषा साहित्य, कला (सङ्गीत नृत्य, नाट्य, चित्रकला), शिक्षा, स्वास्थ्य, कृषि तथा उद्यमशीलता, सामाजिक सेवा, खेलकुद पर्यटन प्रवर्द्धन तथा वातावरण संरक्षण, विज्ञान प्रविधि तथा नवप्रवर्द्धन र अन्य क्षेत्रमा महत्वपूर्ण योगदान गर्ने व्यक्तित्वमध्येबाट नौ जनालाई नगद दुई लाख दुई हजार २०२ नगद, ताम्रपत्र, दोसल्ला र पदकसहित पोखरेली नवरत्न सम्मान गरिने नगर प्रमुख धनराज आचर्याले बताए ।
उनका अनुसार महानगरपालिकामा कार्यरत कर्मचारीहरू मध्येबाट सर्वोत्कृष्ट, उत्कृष्ट र कर्तव्यनिष्ठ गरी ११ जना कर्मचारीहरूलाई सम्मान गरिनेछ ।
माध्यमिक शिक्षा परीक्षा (एसइई) मा ४ जीपीए अङ्क प्राप्त गर्ने ६७ जना विद्यार्थी र महानगर स्तरीय परीक्षा (कक्षा ८) मा ४ जिपिए अङ्क प्राप्त गर्ने १२ जना विद्यार्थीलाई सम्मान गरिनेछ ।
यस्तै, कक्षा ८ को परीक्षामा विषयगत रूपमा औसत उपलब्धि हासिल गर्ने ३० जना र एसइईतर्फ ३० जना गरी ६० जना उत्कृष्ट शिक्षकहरूलाई सम्मान गरिनेछ ।
कक्षा ८ को परीक्षामा शतप्रतिशत नतिजा हासिल गर्ने १५ ओटा, एसइईतर्फ ४९ तथा सामुदायिक र संस्थागत विद्यालयतर्फ सबैभन्दा बढी जीपीए प्राप्त गर्ने एक/एक विद्यालयलाई पनि सम्मान गरिने प्रमुख आचार्यले बताए ।
महानगरपालिकाका ३३ वडामध्येबाट सरसफाइमा उत्कृष्ट तीन ओटा वडा, महानगर मातहतका कार्यलयमध्येबाट सरसफाइमा उत्कृष्ट कार्यालय र महानगरपालिकालाई तोकिएको समयमा नियमित र सबैभन्दा बढी राजश्व तिर्ने उत्कृष्ट करदातालाई पनि सम्मान गर्ने कार्यक्रम छ ।
उमेरको ज्येष्ठताका आधारमा महानगर मातापिता (ज्येष्ठ नागरिक) सम्मान प्रदान गरिनेछ। स्थापना दिवसका अवसरमा किसानहरूलाई प्रोत्साहन गर्ने उद्देश्यले कृषि क्वीच कार्यक्रम, रक्तदान कार्यक्रम, सारङ्गी पार्क शिलान्यासलगायत विशेष सम्मानसमेत प्रदान गरिनेछ।
मूल समारोहको पूर्वसन्ध्यामा मानवअधिकारचोक चिप्लेढुंगादेखि सभागृहसम्म सांस्कृतिक झाँकी र्यालीसमेत गरिनेछ ।
मूल समारोहमा पोखरा महानगरपालिकाकासँग भगिनी सम्बन्ध कायम गरिएका स्वदेशी तथा विदेश नगरका प्रमुख तथा प्रतिनिधि, मुलुकका सबै महानगरपालिका, उपमहानगरपालिकाका प्रमुख, छिमेकी पालिकाका प्रमुख, पोखरा महानगरपालिकाका पूर्व पदाधिकारी, पूर्व प्रशासकीय अधिकृतलगायत विशिष्ट व्यक्तिलाई आमन्त्रण गरिएको छ ।
स्थापना दिवस तयारीका लागि मूल समारोह समिति, निर्देशक समिति र विभिन्न उपसमिति गठन गरिएको छ ।
