पोखरा। नेपाल प्रिमियर लिग (एनपीएल) टी-२० क्रिकेटमा विराटनगर किंग्सको अपराजित यात्रा रोकिएको छ । विराटनगरलाई चितवन राइनोजले ४८ रनले पराजित गरेको हो ।
लिगको १२ औँ खेलमा जितका लागि १७५ रनको चुनौती पछ्याएको विराटनगरले १६ ओभर ५ बलमा अलआउट हुँदै १२६ रनमात्र बनाउन सक्यो ।
तीन खेलाडीले मात्र दोहोरो स्कोर गरेको खेलमा मर्चेन्ट डे लाङ्गेले २२ बलमा ३९, प्रतिश जीसीले १२ बलमा ३० रन तथा साम हेज्लेटले ११ बलमा २२ रन बनाए ।
चितवनका लागि पर्साका रन्जित कुमारले २१ रन खर्चेर ५ विकेट लिए । त्यस्तै कमल ऐरीले २ विकेट लिए ।
यसअघि खेलमा टस हारेर पहिले ब्याटिङ गरेको चितवनले ५ विकेटको क्षतिमा १७४ रन बनायो । रवि बोपाराले लगातार तेस्रो अर्धशतक बनाउने क्रममा ३८ बलमा ६५ रन जोडे । सेफ जैबले ३० बलमा ३२ तथा देव खनालले २२ बलमा २८ रन जोडे । विराटनगरका लागि सन्दीप लामिछाने र मर्चेन्ट डे लाङ्गेले समान २ विकेट लिए ।
आठ टिम सहभागी एनपीएलमा अहिलेसम्म सुदूरपश्चिममात्र अपराजित छ । सुदूरले खेलेका तीन ओटै खेल जितेको छ । विराटनगरले चार खेल खेलेकामा शुरुआती तीन खेल जिते पनि चौथो खेलमा हार बेहोरेको छ ।
चितवन तीन खेलबाट दुई जितसहित ४ अंकबाट तेस्रो तथा काठमाडौँ ४ खेलमा दुईमा जित र दुईमा हार बेहोर्दै ४ अंकसहित चौथो स्थानमा छ ।
लुम्बिनी र कर्णालीले तीनमध्ये एक खेलमात्र जितेका छन् । पोखरा र जनकपुरले दुवै खेल हारेका छन् ।
