सर्लाही । सर्लाहीको लालबन्दी नगरपालिका वडा नं ७ डुमडुमे मन्दिर नजिक शरीरमा पेट्रोल छरेर आगो लगाई आत्मदाह प्रयास गरेका एक पुरुषको मृत्यु भएको छ।मृत्यु हुनेमा झापाको गौरादह नगरपालिका वडा नं २ निवासी ५५ वर्षीय सूर्यप्रसाद पोखरेल छन्।
घटनामा गम्भीर घाइते भएका ती पुरुषको उपचारको क्रममा जनकपुरमा मृत्यु भएको प्रहरीले जनाएको छ। प्रहरीका अनुसार गएराति ७ः४० बजे सो स्थानमा उनले आँफै शरीरमा पेट्रोल छरेर आगो लगाएका थिए। स्थानीयले आगो लागेको देखेपछि करिब ७ः५० बजे इलाका प्रहरी कार्यालय लालबन्दीमा खबर गरेका थिए।
इलाका प्रहरी कार्यालय लालबन्दीबाट प्रहरी निरीक्षक वीरेन्द्र सिंह जोहारीको कमाण्डमा प्रहरी टोली राति ८ बजे घटनास्थल पुगेको थियो।
टोलीले आगोले गम्भीर रूपमा जलेका घाइते उनलाई तत्कालै सिटी हेल्थ केयर लालबन्दीमा उपचारका लागि पुर्याएको थियो।
आगोबाट उनको ९० प्रतिशत शरीर जलेको र अवस्था अत्यन्त गम्भीर रहेको थियो।
त्यहाँ सामान्य उपचारपछि उनलाई राति करिब ९ बजे एम्बुलेन्समार्फत थप उपचारका लागि प्रादेशिक अस्पताल जनकपुरतर्फ पठाइएको थियो।
तर, उपचारकै क्रममा बुधबार राति २ः१० बजे ती पुरुषको मृत्यु भएको हो। प्रहरीका अनुसार मृतकको पहिचान मोबाइलमार्फत खोजी गर्दा भएको हो।
मोबाइलमा उनका भान्जाको नम्बर भेटेको र त्यहाँबाट सम्पर्क भएको हो। मृतकका आफन्तहरू घटनास्थलतर्फ आईरहेका प्रहरी स्रोतले जनाएको छ।
उनले शरीरमा पेट्रोल छर्केर आत्मदाहको प्रयास किन गरे भन्ने बिषय हालसम्म खुलेको छैन।
शव पोस्टमार्टमका लागि प्रादेशिक अस्पताल जनकपुरमै रहेको र घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।
