पोखरा । सोनाम ल्होसारको अवसर पारेर बैदाम तामाङ सेवा समाजको आयोजनामा हुने १०औँ मिस तामाङ पोखरा-२०२६ को तयारी शुरू भएको छ ।
तयारीअन्तर्गत पोखरा महानगरभित्रका विभिन्न तामाङ घेदुङ इकाइबीच छलफल भएको छ ।
छलफलमा तामाङ घेदुङ गण्डकी उपाध्यक्ष रामबहादुर ब्लोन (शिवु) ले महिला शिक्षित भए परिवार शिक्षित हुन्छ, परिवार शिक्षित भए समाज र देश शिक्षित हुन्छ भन्ने अवधारणा प्रतियोगिता दिएको बताए ।
नेपाल जेसीसका पूर्वअध्यक्ष राजु केसीले नारी शिक्षाले घर-समाज र देशलाई समृद्ध बनाउने बताए । उनले नारी क्षमता विकास, नेतृत्व निर्माण र आत्मविश्वास वृद्धि मिस तामाङले पुर्याउँदै आएको बताए ।
सञ्चारकर्मी सञ्जय मल्लले आफ्ना परम्परा, कला, भाषा र संस्कृति नयाँ पुस्तामा हस्तान्तरण नगर्ने हो भने मौलिकता नै हराउने खतरा रहेको बताए ।
कर्यक्रम संयोजक रोशिला ब्लोन, तामाङ बौद्ध सेवा समिति अध्यक्ष विष्णु तामाङ, तामाङ घेदुङ पोखरा महानगरका कार्यवाहक अध्यक्ष अन्जना तामाङ, कार्यक्रमका कोरियोग्राफर जीता लामालगायतले बोलेका थिए ।
माघ ३ गते पोखरामा हुने मिस तामाङमा आफ्ना छोरी-चेलीलाई सहभागी गराई नयाँ कुरा सिक्ने, आत्मविश्वास बढाउने र क्षमता उजागर गर्ने उत्कृष्ट अवसर दिन समाजका अध्यक्ष ज्याक तामाङले आग्रह गरेका छन् ।
