पोखरा । पोखरास्थित विभिन्न विद्यालयमा सञ्चालित ईसीडीदेखि आधारभूत तहसम्म शैक्षिक सुधार तथा नमुना विद्यालय विकास कार्यक्रम प्रभावकारी देखिएको छ ।
इनोभेसन इन एजुकेसन (इसीइसी) को पहलमा महानगर क्षेत्रका विभिन्न १२ ओटा विद्यालयमा सञ्चालित कार्यक्रमको प्रभाव सकारात्मक देखिएको समीक्षाका क्रममा पाइएको हो ।
परियोजनाअन्तर्गत इसीइसीले शिक्षकको क्षमता अभिवृद्धि, अभिभावक शिक्षा तथा सचेतना कार्यक्रम, प्रधानाध्यापक, विद्यालय व्यवस्थापन समिति र शिक्षक अभिभावक सङ्घका प्रतिनिधिका लागि नेतृत्व विकास, अन्तर्राष्ट्रिय बाल विकास सहजकर्ता प्रशिक्षण तथा शैक्षिक सुधारका लागि निरन्तर अनुगमन, परामर्श तथा सहायतालगायतका कार्यक्रम सञ्चालन गर्ने गरेको छ ।
यस परियोजनाअन्तर्गत यस वर्ष कक्षा ६ देखि ८ सम्मका शिक्षकको क्षमता अभिवृद्धिका लागि गणित र विज्ञान विषयको विषयगत तालिम सञ्चालन गरिएको छ ।
नेपाली फोनेक्स, अङ्ग्रेजी फोनेक्स, अभिभावक अभिमुखीकरण सेमिनार, व्यवहार व्यवस्थापन कार्यशाला, प्रारम्भिक बालबिकासदेखि कक्षा ३ सम्म कक्षाभित्रको सहयोग तथा आवश्यकता अनुसार कार्यशाला सञ्चालन गरिएको छ । महानगर क्षेत्रका विभिन्न क्लष्टरका १२ ओटा विद्यालयमा २०७९ देखि यो कार्यक्रम शैक्षिक सुधार परियोजनाका रूपमा सञ्चालनमा छ ।
सन् २००१ मा स्थापना भएको उक्त संस्थाले देशभर विभिन्न सरकारी तथा निजी विद्यालयसँग सहकार्य गरी शैक्षिक सुधारका कार्यक्रम सञ्चालन गर्दै आइरहेको इसीइसीका अनुसन्धान तथा विकास विभागका उपप्रमुख सिङ्गी थिकेपा ल्होमीले बताए ।
परियोजनाको समीक्षाका क्रममा उनले आइतबार नेतृत्व क्षमता, प्रभावकारी नेतृत्व सिद्धान्त, टिम लिडरको भूमिका, जिम्मेवारी र अधिकार लगायत विषयमा स्पष्ट पारे ।
कार्यक्रममा महानगरपालिकाको शिक्षा महाशाखा प्रमुख हेमप्रसाद आचार्यले परियोजना सञ्चालन भएको विद्यालयको शैक्षिक गुणस्तर सुधारमा सकारात्मक प्रभाव परेको उल्लेख गरे।
महानगरको शिक्षा समिति पदाधिकारीहरूले शैक्षिक सुधारको प्रारम्भिक चरणमा परियोजना निकै प्रभावकारी देखिएको बताएका छन् ।
कार्यक्रममा परियोजनाका इन्चार्ज विजय तामाङले परियोजनाको प्रगति अर्ध वार्षिक प्रतिवेदनको विवरण प्रस्तुत गरेका थिए ।
