पोखरा। विविध चेतनामूलक कार्यक्रमका साथ आज नेपालसहित विश्वका विभिन्न देशहरूमा विश्व मधुमेह दिवस मनाइँदैछ।
मधुमेहको जोखिम, रोकथाम र उपचारबारे चेतना फैलाउनु यो दिवसको मुख्य उद्देश्य हो।
संयुक्त राष्ट्रसङ्घको आह्वानमा सन् २००७ देखि यो दिवस मनाउन प्रारम्भ भएको हो।
राष्ट्रसङ्घले सबै सदस्य राष्ट्रलाई मधुमेहको रोकथाम र उपचारका लागि आ-आफ्नो स्वास्थ्य प्रणालीअनुसार राष्ट्रिय नीति निर्माण गर्न प्रोत्साहन गर्दै आएको छ।
विश्व स्वास्थ्य सङ्गठन (डब्ल्यूएचओ) का अनुसार, सन् २०१४ मा विश्वभर ४२ करोड २० लाख वयस्क मधुमेहबाट प्रभावित थिए, जबकि सन् १९८० मा यो समस्याबाट १० करोड ८० लाख मानिस पीडित थिए। मोटोपना, अस्वस्थ जीवनशैली र शारीरिक गतिविधि कमीका कारण यो रोग बढ्दै गएको हो।
डब्ल्यूएचओ ले बढ्दो मधुमेहलाई रोक्न प्रत्येक देशले दीर्घकालीन स्वास्थ्य नीति, जनचेतना र जीवन शैलीमैत्री वातावरण निर्माणलाई प्राथमिकता दिनुपर्नेमा जोड दिएको छ।
स्वस्थ आहार तथा नियमित व्यायाम गर्ने, धूमपान र मद्यपानबाट टाढा रहनु यो रोगबाट बच्ने मुख्य उपाय हुन्।
