पोखरा । आज निमोनिया विरुद्धको दिवसलाई नेपालमा पनि विविध कार्यक्रम गरी मनाइँदै छ ।
हरेक वर्ष नोभेम्बर १२ तारिखमा विश्व निमोनिया विरुद्धको दिवस मनाउने गरिन्छ ।
विश्वमा कोरोना महामारी, डेंगीलगायतका संक्रामक रोगमा निमोनिया मुख्य लक्षण मानिएको छ ।
निमोनिया विभिन्न प्रकारका जीवाणुहरूको संक्रमणबाट फोक्सोमा आउने एक प्रकारको खराबी हो।
ब्याक्टेरिया र भाइरलबाहेक अरू कारणले पनि निमोनिया हुन सक्छ ।
निमोनियाले धेरै जसो पाँच वर्षमुनिका बालबालिका र वृद्धवृद्धालाई सताउने गरेको छ ।
निमोनियाको रोकथाम र उपचारमा विशेष ध्यान पुर्याउन विश्व स्वास्थ्य संगठन डब्ल्यूएचओले आग्रह गरेको छ ।
यसको न्यूनीकरणका लागि निमोनियाविरुद्धको खोपसहित अरु रोकथामका सुरक्षा अपनाउनुपर्ने चिकित्सकहरू बताउँछन् ।
निमोनियाको बारेमा जनचेतना बढाउन सन् २००९ देखि हरेक वर्षको नोभेम्बर १२ तारिखमा यो दिवस मनाउन थालिएको हो ।
बिरामीको अवस्थाअनुसार उपचार हुने भएकाले लक्षणहरू देखिनासाथ स्वास्थ्य संस्थामा जानुपर्ने चिकित्सकहरूले सल्लाह दिएका छन् ।
