काठमाडौँ। सरकारले नेपाल प्रहरीको ३३औं महानिरीक्षक पदमा प्रहरी अतिरिक्त महानिरीक्षक दानबहादुर कार्कीलाई नियुक्त गर्ने निर्णय गरेको छ।
मन्त्रिपरिषद्को आजको बैठकले कार्कीलाई यही कात्तिक २७ गतेदेखि लागू हुने गरी महानिरीक्षक पदमा नियुक्त गर्ने निर्णय गरेको सरकारका प्रवक्तासमेत रहेका सञ्चार तथा सूचना प्रविधिमन्त्री जगदीश खरेलले जानकारी दिए।
कार्की २०५२ साल चैतमा प्रहरी निरीक्षक पदबाट प्रहरी सेवामा प्रवेश गरेका थिए ।
उनी २०६६ मा प्रहरी नायव उपरीक्षक (डीएसपी), २०७२ मा प्रहरी उपरीक्षक (एसपी), २०७९ मा प्रहरी वरिष्ठ उपरीक्षक (एसएसपी), २०८२ मा डीआइजी भएका थिए । कार्की केही अघि मात्रै एआइजीमा बढुवा भएका थिए। कार्कीले अब २७ कात्तिकबाट प्रहरीको नेतृत्व सम्हाल्नेछन् ।
कार्कीले राजनीति शास्त्रमा स्नातकोत्तर गरेका छन् । पूर्वी टिमोरमा २ पटक र हाइटीमा १ पटक मिसन गएका छन् ।
प्रहरी नियमावलीमा उल्लेख रहेको ३० वर्षे सेवा अवधिका कारण वर्तमान आईजीपी चन्द्रकुवेर खापुङ २६ कात्तिक राति १२ बजेबाट अनिवार्य अवकाशमा जाँदैछन् ।
