पोखरा । गण्डकी विश्वविद्यालयका कुलपति प्राडा ईन्द्रप्रसाद तिवारीले विद्यार्थीको विदेश पलायन रोक्ने गरी शैक्षिक योजना ल्याउनु पर्नेमा जोड दिएका छन् ।
पाेखराको लेखनाथस्थित त्रिवेणी इन्टरनेशनल कलेजको १०औँ वार्षिक साधारणसभामा तिवारीले विश्वविद्यालको एकेडेमिक कोर्षमा विद्यार्थीहरू आश्वस्त हुन नसकेकाले विदेश पलायन हुने गरेको उल्लेख गरे ।
निवारीले गण्डकी विश्वविद्यालयले प्रविधि र अनुसन्धानको क्षेत्रलाई लक्षित गरी पाठ्यक्रमको तयारी गरेको बताए । गण्डकी प्रदेश सरकारले अनुसन्धानको क्षेत्रमा काम गर्ने थप जिम्मेवारी दिएको उनले उल्लेख गरे । यही शैक्षिकसत्रको अन्त्यसम्म विश्वविद्यालयबाट ६० जना आइटीका विद्यार्थी बजारमा निस्कने भन्दै उनले उनीहरूलाई रोजगारीको अवसर दिन आग्रह गरे ।
कुलपति तिवारीले विद्यार्थीलाई रोजगारीका बहुक्षेत्रमा प्रवेश गर्न सक्ने गरी क्षमतावान बन्ने गरी अध्यापन गराउन जोड दिए । उनले विद्यार्थीले रोजगारीसँगै अध्ययनलाई पनि जारी राख्नसक्ने वातावरण कलेज र बजारले बनाईदिनु पर्ने बताए ।
आजकल अधिकांश अभिभावकले आफ्ना बच्चाहरू विदेश उड्ने अवस्थामा मात्रै थाह पाउने गरेको उल्लेख गर्दै उनले कक्षा १२ सकेका विद्यार्थीलाई देशमा केही हुँदैन भन्ने भाष्य सिर्जना भएको समेत स्पष्ट पारे ।
कार्यक्रममा लेखनाथ उद्योग वाणिज्य संघका अध्यक्ष जानुका पराजुली, लेखनाथ खानेपानी उपभोक्ता समिति अध्यक्ष मुरारी शर्मा, हिसान कास्की अध्यक्ष यमबहादुर रोका, भवानी कालिका माविका प्रधानाध्यापक रमेश भट्टराई, कलेजका पूर्वअध्यक्ष राजेन्द्रमणि लामिछाने, निर्वतमान अध्यक्ष बाबुराम गिरी, कलेज प्रमुख यदुनाथ आचार्य, सहायक प्रमुख डिल्लीराम पौडेल, विद्यार्थी कल्याणकारी समिति अध्यक्ष सुदीनमोहन भट्टराई, त्रिवेणी इन्टरनेशनल कलेज एलुम्नाई एसोसिएसन अध्यक्ष अशिम पाण्डेलगायतले कलेजको शैक्षिक गुणस्तरका बारेमा बोलेका थिए ।
कलेजका अध्यक्ष सुमन भट्टराईले शिक्षामा सरकारी, सामुदायिक र निजी गरी वर्गीकरण गरेर विभेद गर्न नहुने बताए । उनले कलेजमा शुल्क नभएका कारण कोही पनि विद्यार्थी शिक्षाबाट बन्चित हुन नपर्ने बताए ।
जेहेन्दार र आर्थिक हिसाबले कम अवसर पाएका विद्यार्थीका लागि कलेजले विभिन्न संघसंस्थाको सहकार्यमा छात्रवत्तिका अध्ययनको व्यवस्था मिलाएको बताए ।
त्रिभुवन विश्वविद्यालयबाट सम्वन्धन प्राप्त त्रिवेणी इन्टरनेशनल कलेजमा व्यवस्थापन बिषयमा स्नातक र स्नाकोत्तर तहका कक्षा सञ्चालन हुँदै आएको छ। कलेजमा झण्डै छ सय विद्यार्थी अध्ययनरत छन् ।
