काठमाडौँ। हङकङमा जारी हङकङ इन्टरनेशनल सिक्सेस प्रतियोगिताअन्तर्गत नेपालले आज (शनिबार) भारतलाई ९२ रनको विशाल अन्तरले पराजित गर्दै प्रतियोगितामा आफ्नो पहिलो जित दर्ता गरेको छ।
पहिले ब्याटिङ गरेको नेपालले निर्धारित छ ओभरमा कुनै पनि विकेट नगुमाई १ सय ३७ रन को ठूलो योगफल तयार पारेको थियो। नेपालका लागि राशिद खानले सर्वाधिक ५५ रन, सन्दीप जोराले ४७ रन र लोकेश बमले अविजित ३१ रन को योगदान दिए।
नेपालले दिएको १ सय ३८ रनको लक्ष्य पछ्याएको भारत तीन ओभरमा अलआउट हुँदै मात्र ४५ रनमा समेटिएको थियो। भारतका लागि भरत चिप्ली र प्रियांक पञ्चालले १२/१२ रन बनाएका थिए भने रोविन उथप्पा, दिनेश कार्तिक र सहबाज नदिमले खासै उल्लेखनीय प्रदर्शन गर्न सकेनन्।
नेपालका लागि बलिङमा राशिद खानले तीन विकेट लिए भने रुपेश सिंह र बसिर अहमदले समान दुई/दुई विकेट लिए।
जारी प्रतियोगितामा नेपालको यो पहिलो जित हो। यसअघि आजै भएको समूह चरणको खेलमा नेपाल दक्षिण अफ्रिकासँग चार विकेट र श्रीलङ्कासँग तीन विकेटले पराजित भएको थियो। त्यस्तै हिजो (शुक्रबार) नेपाल अफगानिस्तानसँग पनि पराजित भएको थियो।
